Ýurdumyzda çagalaryň tomusky dynç alyş möwsümi her bir çaga üçin şatlykly pursatdyr. Hormatly Prezidentimiz Arkadagly Gahryman Serdarymyzyň ýolbaşçylygynda çagalaryň saglygyny berkitmek, bilimlerini ösdürmek we şadyýan ýaşamagy üçin giň mümkinçilikler döredilýär. Sagaldyş merkezleri, sport meýdançalary, kitaphanalar we döredijilik gurnaklary çagalaryň tomusky dynç alyş möwsüminde göwnejaý dynç almaklary üçin hyzmat edýär.
Döredijilik bilen meşgullanmak, meselem, hekaýa ýazmak, surat çekmek ýa-da konstruktorçylyk çagalaryň akyl we öz-özlerini beýan etmek ukyplaryny ösdürýär.
Çagalaryň akyl taýdan ösüşi üçin oýunlar hem örän peýdalydyr. Logika we matematika öwredýän stol oýunlary ýa-da interaktiw bilim berýän mobil programmalar çagalaryň pikirlenmek we meseleleri çözmek ukybyny ýokarlandyrýar.
Tomusky dynç alyş möwsüminde çagalar özlerini gyzyklandyrýan ugurlarda kämilleşmek üçin dil we okuw merkezlerine gatnap bilerler. Bu merkezler dil öwrenmek, kompýuter sowatlylygyny ýokarlandyrmak, surat çekmek ýa-da senetçilik önümlerini ýasamak ýaly ugurlarda kämilleşmek mümkinçiligini berýär.
Tomusda açyk howada geçirilen wagt çagalaryň saglygyny berkitmek üçin örän peýdalydyr. Ýüzmek, welosiped sürmek, futbol oýnamak ýa-da tebigatda gezelenç etmek çagalaryň beden taýdan berk bolmagyna ýardam berýär.
Gözel BAZARBAÝEWA,
Türkmenistanyň Magtymguly adyndaky Ýaşlar
Guramasynyň Aşgabat şäheriniň Büzmeýin
etrap Geňeşiniň esasy hünärmeni.
