Halk Maslahaty wekilçilikli edara bolup, onuň işi demokratiýa, aýanlyk, adalatlylyk, kanunyň hökmürowanlygy, halkara hukugynyň umumy ykrar edilen kadalaryny ileri tutmak, adamyň hukuklaryna hem-de azatlyklaryna hormat goýmak, çözgütleri erkin ara alyp maslahatlaşmak, kabul etmek, jemgyýetçilik pikirini nazara almak ýaly mizemez ýörelgelere esaslanýar.
Türkmenistanyň Halk Maslahatynyň esasy aýratynlygy, onda jemgyýetiň ähli gatlaklaryndan bolan, dürli kärdäki raýatlaryň öz pikir-garaýşyny beýan etmäge mümkinçiliginiň bardygydyr. Halk Maslahaty jemgyýetçilik guramalary hem-de pudaklaýyn dolandyryş edaralary bilen bilelikde ýurdumyzy hemmetaraplaýyn üstünlikli ösdürmäge we halkymyzyň abadançylygyny ýokarlandyrmaga gönükdirilen işleri yzygiderli alyp barýar.
Şu ýylyň 19-njy sentýabrynda Türkmenistanyň Halk Maslahatynyň nobatdaky mejlisiniň geçirilmegi göz öňünde tutulýar. Bu bolsa jemgyýetimiziň we döwletimiziň öňünde duran täze wezipeleri kesgitleýän möhüm syýasy çäreleriň biri bolar. Bu mejlisde öňe sürüljek teklipler hem-de kabul ediljek çözgütler halkymyz üçin täze ösüşlere, täze belentliklere tarap badalga bolar. Häzirki günlerde hem Türkmenistanyň Halk Maslahatynyň Prezidiumynyň kararyna laýyklykda, mejlisiň ýokary derejede guramaçylykly geçirilmegi üçin ýörite taýýarlyk işleri görülýär.
Zübeýda GURTÝAZOWA,
Türkmenistanyň Magtymguly adyndaky
Ýaşlar guramasynyň Ahal welaýatynyň
Sarahs etrap Geňeşiniň Guramaçylyk
bölüminiň sanly ulgam boýunça esasy hünärmeni.
