Gülläp ösýän ýurdumyzda sagdyn jemgyýetiň berkarar bolmagyny üpjün etmek maksady bilen, milli Liderimiziň tabşyryklaryndan ugur alyp, jemgyýetçilik guramalary tarapyndan edara-kärhanalarda giňişleýin wagyz-nesihat çäreleri geçirilýär. Ýakynda şeýle çäreleriň biri “Türkmendemirýollary” agentliginiň mejlisler zalynda “Bagtyýar nesil – bagtyýar Watan” ady bilen geçirildi. Ruhy-ahlak gymmatlyklaryny, sagdyn-durmuş ýörelgelerini wagyz etmek, sagdyn nesli kemala getirmek, watansöýüjiligi, ynsanperwerligi, zähmete söýgüni terbiýelemek, edep-ekramly, ahlak taýdan arassa, zyýanly endiklerden daşda durmaklaryny gazanmak, ýüze çykan nogsanlyklary aradan aýyrmak, kanunçylygy we hukuk tertibini pugtalandyrmak maksady bilen geçirlen çäre diýseň täsirli boldy.
Wagyz-nesihat çäresiniň dowamynda Türkmenistanyň Milli geňeşiniň Halk Maslahatynyň Maliýe, ykdysadyýet we durmuş syýasaty baradaky komitetiň agzasy Muhammetnazar Geldiýew, Türkmenistanyň Ýokary Kazyýetiniň wekili Hajarbibi Handurdyýewa, Türkmenistanyň Milli Geňeşiniň Mejlisiniň deputaty, Mejlsiň Adam hukuklaryny we azatlyklaryny goramak baradaky komitetiniň agzasy Aýşat Göjenowa, Türkmenistanyň Kärdeşler arkalaşygynyň geňeşiniň başlygy Ogulbahar Allanazarowa, Türkmenistanyň Milli howpsuzlyk ministrliginiň wekili Hudaýberdi Çopanow, Türkmenistanyň Milli Geňeşiniň Mejlisiniň deputaty, Türkmenistanyň Magtymguly adyndaky Ýaşlar guramasynyň Merkezi Geňeşiniň başlygynyň orunbasary Ýazpolat Keriýew, Türkmenistanyň Döwlet migrasiýa gullugynyň wekili Şatlyk Sylapow, Türkmenistanyň Senagatçylar we telekeçiler partiýasynyň Ahal welaýat komitetiniň başlygy Jeren Kazakowa, Türkmenistanyň Içeri işler ministrliginiň wekili Rustem Salmatow dagy çykyş etdiler.
Olar çykyşlarynda ösüp gelýän ýaş neslimizi milli ruhda, watansöýüji, ata-enä, öý-ojagyna wepaly ýaşlar edip terbiýelemekde her birmiziň aýratyn nygtadylar. Gahryman Arkadagymyzyň ýaşlarymyzyň geljegi üçin döredip berýän mümkinçiliklerini, olara sarp edilýän harajatlaryň ummasyzdygyny bellemek bilen, şu günki güne mynasyp, hormatly Prezidentimiziň ynamyny ödäp bilýän ýaşlar Watanymyzyň guwanjy bolup ýetişjekdigini aýtdylar. Şonuň üçin-de sagdyn bedenli, sagdyn ruhly ýaşlary terbiýeläp ýetişdirmekde wagyz-nesihat işlerini güýçli depginde alyp barmak, bu ugurda hormatly Prezidentimiziň atalyk kitaplaryny ýol-ýörelge edinmegiň şu günki günüň wajyp meselesidigi nygtaldy.
