Türkmenistanyň Bilim ministrliginiň, Türkmenistanyň Senagatçylar we telekeçiler birleşmesiniň we Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikde yglan etmeginde ýaş telekeçileriň we ýaşlar kärhanalarynyň arasynda «Mahabat – üstünligiň açary» atly festiwaly geçirmek maksady bilen düzgünnama tassyklanyldy. Düzgünnama laýyklykda, festiwala gatnaşmaga «Ýaşlar barada döwlet syýasaty hakynda» Türkmenistanyň Kanunynyň 1-nji maddasynyň 3-nji bendinde görkezilen ýaşlaryň (okuwçy ýaşlar, talyp ýaşlar, ýaş hünärmenler, zehinli ýaşlar, telekeçi ýaşlar, alym ýaşlar) we 7-nji bendinde görkezilen eýeçiligiň döwlete dahylsyz görnüşindäki we işgärleriniň azyndan 75 göterimini ýaşlar düzýän kärhanalaryň (mundan beýläk – dalaşgärler) hukuklary bardyr.
Festiwaly geçirmegiň esasy maksady ýaş telekeçileriň we ýaşlar kärhanalarynyň ýurdumyzyň jemgyýetçilik, durmuş-ykdysady, medeni durmuşyna işjeň gatnaşmaklaryny gazanmak, ýaşlary mahabat işiniň çygryna çekmek üçin höweslendirmeler ulgamyny ösdürmekden hem-de dalaşgärleriň iň gowy başlangyçlaryny saýlap almakdan, dalaşgärleriň döredijilik ukyplaryny, başarnyklaryny, özboluşly çözgütlerini ýüze çykarmakdan hem-de iň oňat mahabat önümini we mahabat nusgalaryny döretmekden ybaratdyr.
Festiwalyň 1-nji tapgyry 2023-nji ýylyň 20-nji maýyna çenli, 2-nji tapgyry 2023-nji ýylyň 27-nji maýyna we 3-nji tapgyry 2023-nji ýylyň 31-nji maýyna çenli geçiriler.
Bäsleşikde ýörite talaplar bellenilip, bildirilýän talaplara laýyk gelmeýän işlere festiwalyň bäsleşik maksatnamasyna gatnaşmaga rugsat berilmeýär, ýöne festiwalyň çäginde Guramaçylyk toparynyň karary bilen görkezilip bilner.
Bäsleşikde ýeňijiler yglan edilip, olara diplomlar we gymmat bahaly sowgatlar gowşurylar.
Doly maglumaty https://www.education.gov.tm/tm/documents internet web saýtyndan okap bilersiňiz!
