Türkmenistanyň Prezident i Ministrler Kabinetiniň mejlisin i geçirdi.
Oňa harby we hukuk goraýjy edaralaryň, käbir ministrlikleriň we pudak edaralarynyň, köpçülikleýin habar beriş serişdeleriniň ýolbaşçylary, ýokary okuw mekdepleriniň rektorlary gatnaşdylar. Ýurdumyzda uly toýuň — “Aşgabat 2017-niň” oýunlarynyň dowam edýändigine, dünýä ýurtlaryndan müňlerçe myhmanlaryň gelendigine garamazdan, bu geçirilen mejlis milli Liderimiziň çäksiz aladasy bilen ýurdumyzyň gülläp ösüşleri, halkymyzyň abadan ýaşaýşy baradaky aladanyň möhüm wezipeleriň esasylarynyň biri hasaplanýandygynyň güwäsi boldy.
Hormatly Prezidentimiz ilki bilen ýurdumyzyň medeniýet ulgamyna gözegçilik edýän wise-premýeriň hasabatyny diňledi. Ol öz hasabatynda ýurdumyzda geçirilýän medeni-köpçülikleýin çäreler, halkymyzyň taryhy-medeni mirasy barada alnyp barylýan işler dogrusynda gürrüň berdi.
Milli Liderimiz bagtyýarlyk döwrüniň talaplaryna laýyklykda medeniýet ulgamyndaky edilýän işleriň işjeňleşdirilmeginiň zerurdygyny belläp, medeniýet edaralarynyň we köpçülikleýin habar beriş serişdeleriniň işini kämilleşdirmek, döredijilik işgärleriniň hünär derejesini ýokarlandyrmak barada aýratyn durup geçdi. Daşary ýurtlar bilen medeni gatnaşyklary ýygjamlaşdyrmak, özara hyzmatdaşlygyň netijesinde bolsa halkymyzyň ruhy mirasyny bütin dünýä ýaýmak hakynda anyk görkezmeleri berdi.
Ýurdumyzyň bilim we saglyk ulgamyna gözegçilik edýän Ministrler Kabinetiniň Başlygynyň orunbasary öz sözüni çagalaryň arasynda geçirilýän “Garaşsyzlygyň merjen däneleri” atly bäsleşigiň ýerlerde üstünlikli geçirilendigini, onuň jemleýji tapgyrynyň bolsa, Aşgabat şäherinde sentýabryň soňky on günlüginde boljakdygy bilen başlady. Wise-premýer sözüniň dowamynda Türkmenistanyň Ylymlar akademiýasy bilen Hytaý Halk Respublikasynyň Ylym we tehnikalar merkeziniň bilelikde oktýabr aýynyň 11-12-sine paýtagtymyzda “Innowasiýalar, täze tehnologiýalar hem-de olary önümçilige ornaşdyrmagyň meseleleri” diýen at bilen I türkmen-hytaý ylmy-forumyny geçirmegiň meýilleşdirilýändigini belledi.
Hormatly Prezidentimiz şeýle bähbitli forumyň guramaçylarynyň we oňa gatnaşyjylarynyň öňünde duran wezipeler barada aýdyp, bu foruma alymlar, maýadarlar bilen bilelikde ýurdumyzyň telekeçileriniň hem gatnaşmagynyň zerurdygyny nygtady.
Soňra hasabat bilen çykyş eden wise-premýer ýurdumyzyň ekologiýa ýagdaýyny gowulandyrmak, Balkan welaýatynyň çäklerinde nebit meýdanlarynyň hapalanmagyna ýol bermezlige gönükdirilen taslamany işläp taýýarlamak hakynda habar berdi. Bu taslamanyň amala aşyrylmagy birnäçe ugurlar boýunça bähbitlidir. Ykdysady nukdaýnazar boýunça gazanylan girdejiden salgytlaryň tölenmegi, täze iş orunlarynyň döredilmegi, ekologiýa tarapdan döwrebap tehnologiýalary ulanmak ýaly oňyn işleri ýerine ýetirmäge taslama ýol açar.
Milli Liderimiz hasabaty diňläp, daşky gurşawy goramagyň we ekologiýa arassaçylygynyň döwletiň ileri tutýan möhüm işleriniň biridigini nygtady. Türkmenistanyň tebigaty goramak boýunça dünýä jemgyýetçiliginiň tagallalaryny goldaýandygyny, senagat pudagynda ekologiýa tarapdan arassa serişdeleriň ulanylýandygyny aýtdy.
Obasenagat toplumyny ösdürmek ýurdumyzyň halk hojalygynyň ileri tutulýan ugry hasaplanýar. Şu günler ýurdumyzyň ekerançylyk meýdanlarynda bugdaý ekiş işleri güýçli depginde gidýär. Bugdaýdan göwnemakul gögeriş almak we gögeren ýerlere tagt suwuny tutmak işleri geçirilýär. Kuwwatly tehnikalardan netijeli peýdalanylýar. Haşal otlara garşy göreşilýär. Pagtanyň bol hasylynyň kemala gelendigini görkezilýän ýokary netijeler subut edýär. Hasabaty diňläp, ýurt Baştutanymyz oba hojalyk işlerini wagtynda tamamlamagyň wajypdygyny nygtady. Ýygnalan pagta hasyly üçin pagtaçylar bilen hasaplaşyklary doly geçirmegiň işleri ilerletjekdigine ünsi çekdi.
Himiýa senagatyny ösdürmek we onuň önümçilik düzümini kämilleşdirmek işinde hem özgerişleriň köpdügini wise-premýer hasabatynda tassyklady. Balkan welaýatynyň Garabogaz şäherinde gurluşygy alnyp barylýan karbamid zawodyny oňa mysal getirdi. Mundan başga-da Garabogaz şäherinde deňiz portunyň durkuny täzelemek we döwrebaplaşdyrmak işleri giňden ýaýbaňlandyrylýar. Milli Liderimiz hasabaty diňläp, şeýle kuwwatly desganyň gurulmagynyň ýurdumyzy ykdysady taýdan uly ösüşlere beslejekdigini belläp geçdi. Azyk howpsuzlygyny üpjün etmek üçin, ekinleri şeýle mineral dökünler bilen iýmitlendirmek zerur. Bol hasyl bolsa, azyk bolçulygynyň gözbaşydyr. Şol sebäpli-de alnyp barylýan gurluşyk işlerine gözegçiligi güýçlendirmek esasy meseleleriň biri bolup durýar.
Mejlisiň dowamynda Aşgabady abadanlaşdyrmak, ony sagdyn we howpsuz ekologiýa gurşawy bilen üpjün etmek meselesine hem üns berildi. Bu hakynda hasabat beren wise-premýer Türkmenbaşy etrabynda Garabogazköl aýlagynyň üstünden geçýän Türkmenbaşy — Garabogaz — Gazagystan awtomobil ýolunyň böleginde täze köprini gurmaklygy teklip etdi. Täze köpri gurulsa, halkara söwda hyzmatdaşlygynyň pugtalanjakdygyny, aýratyn-da täze gurulýan karbamid zawodynda öndüriljek önümleri daşary ýurtlara çykarmaga giň mümkinçilikleriň dörejekdigini aýtdy. Şeýle hem hasabatyň dowamynda Köpetdagyň eteginde we şäheriň uzaboýuna sil akabasyny gurmak hakynda aýdyldy. Ýurt Baştutanymyz bu teklipler ýerine ýetirilende, tehniki taýdan düýpli barlanyp, ekologiýa tarapdan anyk seljermeleriň geçirilmelidigini nygtady.
Watanymyzyň aragatnaşyk ulgamynyň maddy-enjamlaýyn binýadyny pugtalandyrmak hem ileri tutulýan ugurlaryň biridir. Wise-premýer bular baradaky hasabatyny kadalaşdyryjy hukuk namalaryny häzirki döwrüň talaplaryna laýyk getirmek, täze innowasiýalary pudaklara ornaşdyrmak, ilatymyza edilýän aragatnaşyk hyzmatlaryny gowulandyrmak hakyndaky öňde durýan wezipeler bilen dowam etdi. Milli Liderimiz hasabaty diňläp, aragatnaşyk we kommunikasiýalar pudagyna hojalygy dolandyrmagyň döwrebap usullaryny giňden ornaşdyrmak meselesine ünsi çekdi we bu barada degişli tabşyryklary berdi.
Ýurdumyzyň daşary syýasatynyň pugtalandyrylmagy edil şu günki halkara sport baýramynyň geçirilýän günlerinde has-da uly ähmiýete eýedir. Hormatly Prezidentimiziň başlangyjy bilen BMG-niň Adam hukuklary baradaky geňeşiniň Ženewada geçirilen 36-njy maslahatynda kabul edilen “Parahatçylygy we adam hukuklaryny berkitmekde Bosgunlaryň olimpiýa toparlarynyň goşýan uly goşandyny höweslendirmek hakyndaky” Jarnamany iş ýüzüne geçirmek ugrunda alnyp barylýan işler uludyr. Bu barada hasabat beren daşary işler ministri 2018-nji ýylda Aşgabat şäherinde BMG-niň howandarlygynda Bosgunlaryň Olimpiýa hereketine gatnaşmagy boýunça halkara maslahaty geçirmegi teklip etdi. Hormatly Prezidentimiz hasabaty diňläp, Jarnamanyň kabul edilmeginiň ýurdumyzyň halkara abraýyny ýokarlandyrmakda ähmiýetiniň uludygyny, Diýarymyzyň dünýä ýüzünde parahatçylyk söýüjilik, hoşniýetli goňşuçylyk, oňyn Bitaraplyk ýörelgelerine berk eýerýändiginiň miwesidigini belledi. Türkmenistanyň ynsanperwer ýörelgeleri esasynda özlerine bagly bolmadyk sebäplere görä, ýurdundan çykyp gitmäge mejbur bolan daşary ýurtly raýatlar üçin, ýurdumyzyň olaryň ikinji Watanyna öwrülendigini aýtdy. Bu adamlar türkmen halkynyň myhmansöýerlik, açyk göwünlilik däbine görä, güler ýüz bilen garşylanyp, olaryň ýaşaýyş-durmuşynyň rowaçlygy üçin ähli zerur şertler döredildi.
Ýurt Baştutanymyz oktýabr aýynda Ahal welaýatynda geçiriljek Ýaşulularyň maslahatyny hem agzap geçdi. Bu maslahatyň ýokary guramaçylyk derejesinde geçmelidigini aýratyn nygtady. Milli Liderimiz mejlise gatnaşyjylara berk jan saglyk, maşgala agzybirligini, işlerinde rowaçlyklar arzuw edip, olar bilen hoşlaşdy.
“Nesil” gazeti,
24.09.2017ý.
