Türkmenistanda ýokary we orta hünär okuw mekdeplerine giriş möwsümi başlandy. Onuň çäginde okuwa girjeklerden resminamalar kabul edilýär.
Ýurdumyzyň ýokary we orta hünär okuw mekdeplerine girmek isleýän ýaşlara öňküden köp hünär teklip edýärler, çünki olaryň sany, däp boýunça, bu ýyl-da artdyryldy.
Umuman alanyňda, ýurdumyzyň okuw mekdeplerine 22 sany täze hünär girizildi. Olardan 12 ugur hünärmen taýýarlygy, bakalawr we magistr maksatnamalar boýunça öňümizdäki okuw ýylynda ýurdumyzyň ýedi ýokary okuw mekdebinde, ýene 10 sany täze hünär bolsa dört orta hünär okuw mekdebinde başlanýar.
Dört sany ýokary okuw mekdebi täze ugurlar boýunça hünärmenleri we bakalawrlary taýýarlap başlar. Olaryň arasynda Seýitnazar Seýdi adyndaky Türkmen döwlet mugallymçylyk instituty-da bar. Bu ýokary okuw mekdebi defektologiýa, hytaý, pars we türkmen dilleri we edebiýaty boýunça ugurlary açýar. Türkmen döwlet binagärlik-gurluşyk instituty standartlaşdyrmak, metrologiýa, sertifikatlaşdyrma, şeýle hem seýsmologiýa we ýer titremesine çydamly gurluşyk boýunça okuwlary hödürleýär. Türkmen döwlet ykdysadyýet we dolandyryş institutynda açylan täze ugur halkara söwdasydyr. Türkmenistanyň Inžener-tehniki we ulag kommunikasiýalary instituty bolsa täze uçujy enjamlaryň we olaryň hereketlendirijileriniň tehniki ulanylyşy, uçarçylyk we howa gämileriniň radioelektron enjamlarynyň tehniki ulanylyşy ugurlary boýunça okuwlary hödürleýär.
Üç sany ýokary okuw mekdebinde magistratura maksatnamasy boýunça täze ugurlar girizildi: S.A.Nyýazow adyndaky Türkmen oba hojalyk uniwersitetinde ykdysadyýet we oba hojalygyny dolandyrmak, maldarçylyk tehnikasy, Türkmenistanyň Daşary işler ministrliginiň Halkara gatnaşyklary institutynda halkara arbitraž we iş hukugy, Türkmen döwlet medeniýet institutynda medeniýeti öwreniş.
Orta hünär okuw mekdeplerinde bolsa şu täze hünärler döredildi: Indira Gandi adyndaky Aşgabat lukmançylyk orta okuw mekdebinde radiologiýa, Daşoguzyň agrosenagat orta hünär okuw mekdebinde ykdysadyýet we önümçilik guramasy, ykdysadyýet we buhgalter hasapçylygy, sanly ykdysadyýet, ýer dolandyrylyşy we kadastrlar, S.A.Nyýazow adyndaky Türkmen oba hojalyk uniwersitetiniň Baýramaly agrosenagat orta hünär okuw mekdebinde mal dermançylygy we azyk önümçiligi tehnologiýasy, «Türkmengaz» döwlet konserniniň Mary nebitgaz orta hünär okuw mekdebinde içerki sanitar enjamlaryny oturtmak we işletmek, howany kondisionirleme we howa çalşygy, ölçeg enjamlary we awtomatlaşdyryş, kebşirleýiş önümçiligi.
Hünärleriň sanynyň artdyrylmagy bilen bir hatarda, ýurdumyzyň ýokary we orta hünär okuw mekdeplerine kabul edilýän talyplaryň hem sany artdy. 2024-2025-nji okuw ýyly üçin ýokary okuw mekdeplere geçen ýyl bilen deňeşdirilende, 303 talyp köp, ýagny 15 müň 926 dalaşgär kabul etmek meýilleşdirilýär. Hünärmen we bakalawr maksatnamalary boýunça 15 müň 303, magistr maksatnamalary boýunça bolsa 623 talyp kabul ediler.
Ýurdumyzyň ýokary we orta hünär mekdeplerinde okuw ugurlarynyň sanawy her ýyl artdyrylýar, şol bir wagtyň özünde talyplaryň sany hem köpelýär. Bilim edaralarynda ýaş hünärmenleri taýýarlamak işi ýokary derejede alnyp barylýar. Milli bilim ulgamyndaky innowasiýa özgerişleri we ony dünýä ülňüleriniň derejesine çykarmak boýunça alnyp barylýan uly göwrümli iş hut şuňa gönükdirilendir.
Ýurdumyzda ýokary okuw we hünärment mekdepleriniň ýokary derejeli enjamlar bilen enjamlaşdyrylan häzirki zaman şäherçeleri gurulýar. Okuw meýilnamalary we maksatnamalary yzygiderli kämilleşdirilýär, täze okuw kitaplary we gollanmalar işlenip düzülýär. Talyp ýaşlar dürli ylmy we bilim forumlaryna, ýaryşlara, olimpiadalara we döwlet, sebit we halkara derejesinde geçirilen beýleki çärelere yzygiderli gatnaşýarlar. Türkmenistanyň bilim edaralary dünýäniň öňdebaryjy ylmy merkezleri we ýokary okuw mekdepleri bilen üstünlikli we netijeli hyzmatdaşlyk edýär. Halkara hyzmatdaşlygyň çäginde tejribe alşylýar, ylmy-barlag we bilim çäreleri bilelikde geçirilýär, türkmen talyplary daşary ýurtlarda mobil okuw we tejribelik geçýärler.
Isleg bildirilýän, ýokary hünärli işgärleri, täze nesliň hünärmenlerini taýýarlamak, zehinli, sowatly, hemmetaraplaýyn ösen ýaşlary terbiýelemek işi munuň üçin ähli zerur şertler we giň mümkinçilikler döredilen ýurdymyzda döwletiň ileri tutýan wezipesidir.
turkmenistan.gov.tm
