Ahal welaýatynyň pagtaçylary ýygym möwsümine dabaraly ýagdaýda girişdiler. Welaýatyň pagtaçylary Halkara parahatçylyk we ynanyşmak ýylynda 135 müň gektar ýerde ýetişdirilen gowaçadan hasylyň 280 müň tonnasyny ýygnap almagy maksat edinýärler.
Welaýatyň Ak bugdaý etrabynyň «Üzümli toprak» daýhan hojalygynyň ekerançylyk meýdanynyň golaýynda pagta ýygymyna girişilmegi mynasybetli şatlyk-şowhunly dabara geçirildi. Toý meýdançasynda aýdym-sazly çykyşlara, baý öwüşginli sergilerdir gyzykly tomaşalara giň orun berildi.
Sahnada welaýatyň medeniýet we sungat işgärleriniň ýerine ýetiren aýdym-sazly çykyşlarynda ata Watanymyz, eşretli döwrümiz, daýhanyň päk zähmeti joşgunly wasp edildi.
Dabaranyň barşynda il sylagly ýaşulular «Bismilla» bilen bol hasyl eçilen gowaça meýdanyndan pagta ýygymyna dabaraly ýagdaýda badalga berdiler. Soňra dabara Tejen etrabyndaky «Altyn asyr» pagta arassalaýjy kärhanasynda «ak kerwen» dabarasy bilen dowam etdi.
Maýsa MYRADOWA,
Türkmenistanyň Magtymguly adyndaky Ýaşlar guramasynyň
Ahal welaýatynyň Ak bugdaý etrap Geňeşiniň baş hünärmeni.
