SANLY BILIMIŇ RÖWŞEN NETIJESI

«Gün bolmasa, nur, kök bolmasa, daragt, ylym we bilim bolmasa, bagtyýarlyk bolmaz» diýip, juda jaýdar belleýän Gahryman Arkadagymyz ýaş nesillere berilýän bilimiň has-da kämilleşmegine aýratyn ähmiýet berýär. Gözel Diýarymyzda ýaşlaryň döwrebap bilim almaklary üçin yzygiderli döredilýän mümkinçilikler bu günki gün özüniň datly miwesini eçilýär.

Iýun aýynyň 17-22-si aralygynda ABŞ-nyň Oswego şäheriniň Nýu-Ýork döwlet uniwersitetinde «Geliň, aýdyň geljegi bilelikde döredeliň!» atly şygar astynda daşky gurşaw meseleleri boýunça mekdep okuwçylarynyň arasyn­da «GE­NIUS — 2019» atly halkara ylmy-taslama bäsleşiginiň jemleýji tapgyry geçirildi. Bu halkara ylmy-taslama bäsleşigine dünýäniň 80-e golaý döwletinden 1280 okuwçy gatnaşyp, olar takyk we tebigy ylymlar, tehnologiýa, sungat, çeper döredijilik, in­že­ner­çi­lik, di­zaýn we işewürlik ýaly 7 ugur boýunça taýýarlan şahsy ylmy-taslama işlerini hödürlediler. Ýurdumyzyň zehinli mekdep okuwçylary bu halkara taslama bäsleşiginde öz ýiti zehinlerini görkezip, emin agzalarynyň ýokary bahalaryna mynasyp bolmagy başardylar. Lebap welaýatynyň Türkmenabat şäherindäki ýöriteleşdirilen 41-nji orta mekdebiň fizika mugallymy Toýly Gurbanowyň ýolbaşçylygynda wekilçilik eden türkmen topary üstünlikli çykyş edip, 3 bürünç medal gazanyp, Watanymyza hoş habar bilen dolanyp geldiler.

Aýratyn zehinli çagalaryň Sa­par­my­rat Türk­men­ba­şy adyndaky Döwlet mekdep-internatynyň 11-nji synp okuwçysy Gerçek Batyrow «V-EX» atly adamy ýangyndan we suwdan goraýan roboty, Aşgabat şäherindäki dil derslerini çuňlaşdyryp öwredilýän ýöriteleş­di­ri­len 97-nji or­ta mek­de­biň 10-njy synp okuwçysy Ahmet Amanow «TELPEXROBOT» atly islendik jisimleri we adamy ýangyndan goraýan roboty, şeýle hem Lebap welaýatynyň Türkmenabat şäherindäki ýöriteleşdirilen 41-nji orta mekdebiň 9-njy synp okuw­çy­sy Is­lam Muhamedjanow «COMBINED SO­LAR DIS­TIL­LER» at­ly suw arassalaýjy filtri (desgasy) bilen çykyş edip, ýeňiş gazanmagy başardylar. Ýeňiji bolan ukyply ýaşlarymyz geljekde hem öz taslama işlerini has-da kämilleşdirip, halkara bäsleşiklerine gatnaşmagy hem-de robotlary durmuşa ornaşdyrmagy meýilleşdirýärler. Goý, mundan beýläk-de zehinli ýaşlarymyza üstünlikler ýar bolsun!

Çaryguly HANJAÝEW,

Halkara ynsanperwer ylymlary we ösüş uniwersitetiniň žur­na­lis­ti­ka hü­nä­ri­niň ta­ly­by.

“Nesil” gazeti,

06.07.2019ý.