Ýakynda paýtagtymyzdaky Jemgyýetçilik guramalarynyň merkezinde Türkmenistanyň Içeri işler ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň ýangyna garşy meýletin jemgyýetiniň hem-de «Adalat» gazetiniň redaksiýasynyň bilelikde guramagynda geçirilen «Ýurt abadan – il bagtyýar» atly döredijilik bäsleşiginiň ýeňijilerine dabaraly ýagdaýda sowgatlar gowşuryldy.
«Ýangyn howpsuzlygy hakynda» Türkmenistanyň Kanunyny ýerine ýetirmek, raýatlaryň ýangyn howpsuzlyk düzgünleri baradaky bilimlerini kämilleşdirmek, olaryň ýangyn howpuna garşy raýatlyk borçlaryna bolan düşünjesini, döredijilik ukyplylygyny artdyrmak, emläk eýeçilige aýawly garamaklaryny hem-de ýangyn-tehniki serişdeleriniň ulanyş ýagdaýlaryny öwretmek, ýangyn-tehniki bilimlerini, hünär ussatlyklaryny ýokarlandyrmak maksady bilen geçirilen bu döredijilik bäsleşigi uly ähmiýete eýe boldy.
Bäsleşigiň Düzgünnamasyna laýyklykda, oňa gatnaşanlar ýangyn howpsuzlyk düzgünlerini wagyz-nesihat edýän temalardan ýazylan makalalar, ýangyn howpsuzlyk düzgünlerine degişli hekaýalar, bolup geçen wakalar, goşgular, şeýle hem bäsleşik bilen baglanşykly düzülen krosswordlar boýunça özara bäsleşdiler. Eminleriň gelen netijelelerine görä, eserleriň arasynda döredijilik aýratynlyklaryny açmagy başaran iň gowy işler saýlanyp alyndy we ýeňiji diýip yglan edildi.
Bäsleşigiň ýeňijilerine guramaçylar tarapyndan hormat hatlary we ýadygärlik sowgatlary gowşuryldy. Dabaranyň ahyrynda oňa gatnaşanlar ýaşlaryň bagtyýar durmuşy, olaryň döwrebap bilim almagy, hünär öwrenmegi, ylmy we çeper döredijilik bilen meşgullanmagy üçin ähli şertleri we mümkinçilikleri döredýän türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak, tutumly işleriniň uly üstünliklere beslenmegini tüýs ýürekden arzuw etdiler.
Näzik ATAÝEWA,
TMÝG-niň Merkezi Geňeşiniň
Guramaçylyk bölüminiň baş hünärmeni.
