Ýakynda paýtagtymyzdaky «Watan» kinokonsert merkezinde Halkara Bitaraplyk güni mynasybetli Türkmenistanyň Magtymguly adyndaky Ýaşlar guramasynyň Merkezi Geňeşi hem-de Türkmenistanyň Bilim ministrligi tarapyndan ýurdumyzyň umumybilim berýän orta mekdepleriniň 3-5-nji synplarynda okaýan okuwçy oglanlaryň arasynda yglan edilen «Merdana nesil-2024» atly şadyýan bäsleşigiň jemleýji tapgyry geçirildi.
Halkara Bitaraplyk güni mynasybetli Türkmenistanyň Magtymguly adyndaky Ýaşlar guramasynyň Merkezi Geňeşi Türkmenistanyň Bilim ministrligi bilen bilelikde guramagynda geçirilen bu bäsleşigiň jemleýji tapgyryna welaýat, Aşgabat hem-de Arkadag şäher tapgyrynda 1-nji, 2-nji orunlary eýelän oglanjyklar gatnaşdylar.
Hormatly Prezidentimiziň: «Siziň belent joşgunda ýerine ýetirýän aýdym sazlaryňyz biziň halkymyzyň dünýä dolýan ykbalydyr, at-abraýy, mertebe-şanydyr, ýüreklere egsilmez şatlyk paýlaýan täsin sungatdyr» diýen sözlerinden ugur alyp, ýurdumyzda ösüp gelýän ýaş nesli watançylyk ruhunda terbiýelemek, olaryň ukyp-başarnyklaryny ýüze çykarmak, maksady bilen geçirilen bu döredijilik bäsleşigi täze zehinleri ýüze çykarmakda uly ähmiýete eýe boldy.
Düzgünnama laýyklykda, bäsleşik üç şert boýunça geçirildi. Onuň birinji şertinde eziz Watanymyza, merdana türkmen halkymyza bolan söýgini, ata-babalarymyzyň gahrymançylykly, asylly ýol-ýörelgelerine belent sarpany, bagtyýar döwrümiziň milli özgertmelerine bolan buýsanjyny gatnaşyjylar çeper sözüň üsti bilen beýan etdiler.
Çagalar bäsleşigiň ikinji şerti boýunça ýekelikde şorta söz ýerine ýetirdiler. Üçünji şertde bolsa hormatly Prezidentimiziň parasatly ýolbaşçylygynda Berkarar döwletiň täze eýýamynyň Galkynyşy döwründe ýurdumyzda amala aşyrylýan uly ösüşleri, dost-doganlygy, bagtyýar çagalygy wasp edýän aýdym-sazly çykyşlary ýerine ýetirdiler.
Munuň özi kiçi ýaşly oglanlary merdana ata-babalarymyzyň asyrlarboýy dowam edip gelýän asylly däplerine hormat goýmak ruhunda terbiýelemekde, olarda kiçilikden hünär öwrenmäge höwes döretmekde, şeýle-de olaryň hakyky watançy ýigitler bolup ýetişmeklerini gazanmakda, öz bilimlerini we döredijilik ukyplaryny görkezmekde uly mümkinçilikdir.
Bäsleşige gatnaşyjylaryň şowhunly çykyşlary tomaşaçylarda uly täsir galdyrdy. Tomaşaçylaryň aglabasy bolsa, paýtagtymyzyň körpe ýaşaýjylarydyr. Olar öz deň-duşlaryny goldamaga geldiler.
Türkmenistanda Ýaşlar baradaky döwlet syýasatynyň 2021-2025-nji ýyllar üçin döwlet maksatnamasyna laýyklykda giň dünýägaraýyşly, kämil ýiti zehinli ýaşlaryň kemala gelmegi üçin ýerine ýetirilmeli çäreleriň tassyklanan meýilnamasam döwletimizde Ýaşlara näderejede uly üns berilýändigini aýdyň görkezýär.
Çagalaryň döredijiligini ösdürmek milli Liderimiziň medeniýet ulgamynyň öňünde goýýan möhüm wezipeleriniň biri bolup durýar. Ösüp gelýän ýaş nesilleriň jemgyýete sazlaşykly goşulmagyny gazanmak üçin kabul edilýän maksatnamalar üstünlikli durmuşa geçirilýär.
Bäsleşigiň ahyrynda eminler toparynyň biragyzdan gelen netijesine görä bäsleşigiň ýeňijileri yglan edildi.
Bäsleşikde Baş baýraga Birleşen Arap Emirlikleriniň Prezidenti Şeýh Zaid bin Sultan Al Nahaýýan adyndaky Döwletliler köşgüniň 5-nji synp okuwçysy Rahman Kuleýmanow mynsayp boldy.
Birinji orna Balkan welaýatynyň Balkanabat şäheriniň daşary ýurt dillerine ýöriteleşdirilen 3-nji orta mekdebiniň 3-nji synp okuwçysy Meretmyrat Myratjanow, ikinji orna Ahal welaýatynyň Gökdepe etrabynyň 19-njy orta mekdebiniň 3-nji synp okuwçysy Halylmyrat Kakadurdyýew we Daşoguz welaýatynyň Daşoguz şäheriniň daşary ýurt dillerine ýöriteleşdirilen 3-nji orta mekdebiniň 3-nji synp okuwçysy Söýün Nazarmedow, degişlilikde üçünji orny bolsa, Arkadag şäheriniň iňlis diline ýöriteleşdirilen 2-nji orta mekdebiniň 4-nji synp okuwçysy Jeýhun Allaberdiýew, Lebap welaýatynyň Türkmenabat şäheriniň daşary ýurt dillerine ýöriteleşdirilen
2-nji orta mekdebiniň 4-nji synp okuwçysy Umyt Töräýew hem-de Mary welaýatynyň Mary etrabynyň 26-njy orta mekdebiniň 5-nji synp okuwçysy Abdyrahman Pollykow dagylar eýelediler.
Ýeňijilere Türkmenistanyň Magtymguly adyndaky Ýaşlar guramasynyň Merkezi Geňeşiniň we Türkmenistanyň Bilim ministrliginiň adyndan Hormat hatlary hem-de ýadygärlik sowgatlar gowşuryldy. Bäsleşigiň jemleýji tapgyryna işjeň gatnaşan beýleki okuwçylara hem Hormat hatlary we höweslendiriji baýraklar gowşuryldy.
Döredijilik bäsleşiginiň ahyrynda oňa gatnaşanlar kalby şatlykdan doly çaglar hakynda çäksiz alada edýän we olaryň tebigy zehinlerini ýüze çykarmak hem-de ukyp başarnyklaryny açyp görkezmek üçin ähli mümkinçilikleri döredip berýän Mähriban Arkadagymyzyň hem-de hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak, belent başlarynyň aman, aýdyň maksatly beýik tutumly işleriniň elmydama rowaçlyklara beslenmegini tüýs ýürekden arzuw etdiler.
Gurbanmyrat MUHAMMEDOW,
TMÝG-niň Merkezi Geňeşiniň bölüm müdiri.
