Berkarar döwletiň täze eýýamynyň Galkynyşy döwründe ata Watanymyzyň bilimler ýurdy hökmündäki şan-şöhraty barha arşa göterilýär. Ýaşlarymyzyň halkara bilim olimpiadalarynda, internet bäsleşiklerinde yzygiderli çykyş edip, üstünlik gazanmagy hem şeýle diýmäge esas berýär. Ýurdumyzda ýaşlaryň, şol sanda mekdep okuwçylarynyň arasynda dürli derejeli halkara olimpiadalary guramagyň däbe öwrülmegi has-da begendirýär. Hormatly Prezidentimiziň 10-njy ýanwarda sanly ulgam arkaly geçiren Ministrler Kabinetiniň nobatdaky mejlisiniň barşynda şu ýylyň aprel aýynda Aşgabatda mekdep okuwçylarynyň arasynda II halkara matematika olimpiadasynyň geçiriljekdigi barada aýdylmagy bolsa, ýaşlarymyzyň şatlygyny şatlyk goşdy.
Ýaş nesliň tebigy zehin-başarnyklaryny ösdürmekde, ylyma we döredijilige höweslerini artdyrmakda okuwçy ýaşlaryň arasynda geçirilýän olimpiadalaryň möhüm orny bar. Mälim bolşy ýaly, geçen şanly ýylda mekdep okuwçylarynyň halkara matematika olimpiadasy Arkadag şäherinde guralyp, oňa ýurdumyzyň mekdep okuwçylarynyň 43-si, daşary ýurtlaryň 11-sinden – Russiýa Federasiýasyndan, Hytaý Halk Respublikasyndan, Eýran Yslam Respublikasyndan, Katar döwletinden, Azerbaýjandan, Belarus Respublikasyndan, Bolgariýadan, Gazagystandan, Özbegistandan, Täjigistandan, Türkiýe döwletinden okuwçy ýaşlaryň 85-si gatnaşyp, öz başarnyklaryny görkezdiler. Üstünlikli geçen şol ders olimpiadasynyň netijesinde Russiýa Federasiýasynyň mekdep okuwçylaryndan ybarat topar birinji orny eýeläp, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat Gaznasynyň hasabyna «Awaza» Milli syýahatçylyk zolagyndaky «Daýanç» sagaldyş-dikeldiş merkezine 10 günlük ýollanma gazandy.
Halkara parahatçylyk we ynanyşmak ýylynda Aşgabatda mekdep okuwçylarynyň arasynda II halkara matematika olimpiadasynyň geçirilmegi, oňa ýurdumyzyň mekdep okuwçylary bilen bir hatarda, daşary ýurtlaryň umumybilim berýän mekdepleriniň zehinli ýaşlarynyň gatnaşmagy ugrundaky tagallalary üçin hormatly Prezidentimize çäksiz alkyş aýdýarys.
Aýnagözel NURYÝEWA,
Türkmenistanyň Magtymguly adyndaky
Ýaşlar guramasynyň Ahal welaýatynyň
Ak bugdaý etrap Geňeşiniň hünärmeni.
