Saud Arabystanynda geçen halkara ýaryşda 13 ýaşly türkmen tennisçisi Süleýman Hudaýberdiýew iki gezek hormat münberine çykdy. Ýaryşlar Jiddada Aziýa Tennis Federasiýasynyň (ATF) howandarlygynda geçirildi. Oňa 13 ýurtdan 14 ýaşa çenli ýetginjekleriň 36-sy gatnaşdy.
Ýekelikde çykyş etmekde ildeşimiz kümüş baýraga, jübüt bolup çykyş etmekde bolsa iň ýokary baýragyň eýesi boldy.
Finala tarap ýolda ýekelikde birinji belgide çykyş edip, S.Hudaýberdiýew Kemeron Prattliden (Hytaý Gonkongy) – 6:2, 6:1, Elýas Algafliden (Saud Arabystany) – 6:1, 6:3 hem-de Fahad Saifden (Yrak) – 6:0, 6:2 hasabynda yzly-yzyna üstün çykyp, üç ýeňiş gazandy.
Baş baýrak ugrundaky jemleýji duşuşyk «Ashgabat Open 2024» ýaryşynyň finalynyň gaýtalanmasyna öwrülip, onda Süleýman Pakistandan dördünji belgili Mohammed Hassan Usmani bilen duşuşdy. Aşgabatda geçen ýaryşda biziň tennisçimiz diňe bir geými ýeňen bolsa, bu gezek S.Hudaýberdiýew pakistanly türgene has mynasyp garşydaşlyk görkezip, birinji setde üç we ikinjisinde bir – dört geým üstün çykdy.
Jübütleýin duşuşyklarda ýekelikde çykyş eden finalçylar Süleýman Hudaýberdiýew hem-de Mohammed Hassan Usmani bilelikde çykyş edip, garşydaşlarynyň hiç birine ýeňmäge mümkinçilik bermediler. Çärýek finalda olar Iordaniýadan Omar Haşemini we Saif Haşemini – 6:1, 6:1 hasabynda aňsatlyk bilen ýeňdiler, ýarym finalda dürli milletlerden bolan Markus Lorenso Godan (Filippinler) hem-de Fahad Saifden (Yrak) – 7:5, 6:2 hasabynda üstün çykdylar, finalda bolsa Saud Arabystanyndan gelen ikinji belgide çykyş eden jübütler Ana Alzahraniden we Suhail El-Taji El-Farukiden super taý-breýkde – 7:5, 4:6, 10:8 hasabynda üstün çykdylar.
Sylaglanyş dabarasynda Süleýman Hudaýberdiýewe baýraklary dünýä tennisinde ady rowaýata öwrülen, 2008-nji ýylda ýekelikde we 2016-njy ýylda jübüt bolup çykyş etmegiň olimpiýa çempiony, Uly tuwulga ýaryşlarynyň 22-siniň, «Masters» tapgyryndaky ýaryşlaryň 36-synyň ýeňijisi, Ispaniýanyň ýygyndy toparynyň düzüminde Dewisiň Kubogynyň bäş gezek eýesi Rafael Nadal gowşurdy.
Süleýman Hudaýberdiýew 6 ýaşyndan bäri tennis bilen meşgullanýar. Ol ilkinji gezek özüni 2023-nji ýylda tanatdy. Şonda ol Türkmenistanyň ýygyndy toparynyň düzüminde Aşgabatda 12 ýaşdan uly bolmadyk oýunçylaryň arasynda Merkezi Aziýa ýaryşynyň kümüş baýragynyň eýesi boldy.
Geçen ýyl türkmenistanly ýaş türgen üçin has-da üstünlikli boldy. Süleýman ildeşimiz Emirhan Rustamow bilen jübütlikde çykyş edip, Täjigistanda «2nd Open Dushanbe Championship 14&Under» we Çolpan-Atada (Gyrgyzystan) «Issyk Kul Tournament U14» ýaryşlarynda kümüş baýragyň, russiýaly Jamal Hakimow bilen jübüt bolup çykyş edip, 14 ýaşdan uly bolmadyk oýunçylaryň arasynda Täjigistanyň Prezidentiniň Kubogy ugrundaky ýaryşyň kümüş medalynyň eýesi boldy.
Oktýabr aýynda Süleýman Hudaýberdiýew Doha şäherinde geçirilen «3rd Qatar Asian Junior Tournament 14 & U» ýaryşlarda ýekelikde çykyş etmekde ikinji orny eýeledi. Noýabr aýynda ol bu üstünligini deň-duşlarynyň arasynda «Ashgabat Open 2024» ýaryşynda gaýtalady. Ine, indi bolsa Saud Arabystanynda «Asian 14 & Under Category 2 Jeddah» ýaryşynda ýekelikde we jübüt bolup çykyş etmekde ýene-de kümüş we altyn medallara mynasyp boldy.
Süleýman Hudaýberdiýew sport bilen meşgullanmagy Aşgabat şäherindäki 86-njy ýöriteleşdirilen orta mekdepde 8-nji synpda okamak bilen üstünlikli utgaşdyrýar, iňlis diline erkin erk edýär. Tälimçi Gurbanberdi Gurbanberdiýewiň tälim bermeginde tennis bilen meşgullanýar.
Ozal biziň saýtymyza beren interwýusynda Süleýman Hudaýberdiýew dünýäniň ilkinji raketkasy bolup, Türkmenistanyň abraý-şöhradyny artdyrmagy arzuw edýändigini aýdypdy.
turkmenistan.gov.tm
