HALKARA PARAHATÇYLYK WE YNANYŞMAK ÝYLYNYŇ ILKINJI AÝYNY HAS-DA DABARALANDYRYP, ÄHLI WATANDAŞLARYMYZY BUÝSANDYRDY
Mälim bolşy ýaly, Gahryman Arkadagymyzyň Monako Knýazlygynda saparda bolan günlerinde «Galkynyş» milli at üstündäki oýunlar topary Monte-Karloda geçirilýän halkara sirk sungaty festiwalynda üstünlikli çykyş edip, Altyn baýraga we beýleki ýörite baýraklara mynasyp boldy. Munuň özi ýurdumyzda Milli Liderimiziň başlangyjy bilen täzeden dikeldilen türkmen sirk sungatynyň uly üstünliklere beslenýändiginiň, dünýä derejesine çykýandygynyň aýdyň güwäsine öwrüldi.
BU FESTIWAL 1974-nji ÝYLDA ESASLANDYRYLDY
1974-nji ýylda esaslandyrylan festiwal dünýäniň sirk sungatynyň iň abraýly we ähmiýetli çäreleriniň biridir. Ol her ýyl Monakonyň Monte-Karlo şäherinde geçirilýär. Sirk sungatynyň meşhurlygyny artdyrmak, onuň däplerini dowam etdirmek, tutuş dünýäde zehinli artistleri ýüze çykarmak festiwalyň esasy maksatlarynyň biridir. Bu giň gerimli çäre sirk sungatyny ösdürmäge, dürli ýurtlaryň arasyndaky medeni gatnaşyklary pugtalandyrmaga ýardam berýär. Festiwal Monte-Karlonyň merkezinde gurnalýan ýörite sirk çadyrynda geçirilýär. Artistler sirk sungatynyň dürli žanrlarynda çykyş edýärler. Ýurdumyzyň meşhur toparynyň şeýle abraýly halkara ýaryşa çagyrylmagy Türkmenistanda sirk sungatynda ýetilen sepgitleriň dünýäde ykrar edilýändigini görkezýär.
MILLI SIRK SUNGATY OKGUNLY ÖSDÜRILÝÄR
Hormatly Prezidentimiziň parasatly baştutanlygynda milli medeniýetimizi we sungatymyzy ösdürmek, dünýäde giňden wagyz etmek boýunça giň gerimli işler durmuşa geçirilýär. Şunda sungatyň dürli ugurlary bilen bir hatarda, milli sirk sungatynyň ösdürilmegine hem möhüm ähmiýet berilýändigini bellemek gerek. Mälim bolşy ýaly, Gahryman Arkadagymyzyň başlangyjy bilen ýurdumyzda milli sirk sungaty täzeden dikeldildi hem-de 2010-njy ýylyň aprelinde Türkmenistanyň Döwlet sirki gaýtadan işläp başlady. Munuň özi häzirki zaman türkmen sirk sungatyny ösdürmegiň ýolunda möhüm tapgyr boldy.
«GALKYNYŞ» — USSATLYGYŇ TAÝSYZ NUSGASY
«Galkynyş» milli at üstündäki oýunlar topary 2007-nji ýylda hormatly Arkadagymyzyň tagallasy bilen döredildi. Bu toparyň at üstünde ýerine ýetirýän akrobatika we gimnastika tilsimleri, bedewlere ussatlyk bilen erk etmek, at çapmak sungatynyň ýokary derejesini görkezýän çykyşlary milli sirk sungatymyzyň özboluşly aýratynlygydyr. Toparyň halkara derejede gazanýan her bir üstünligi bu günki günde bütin halkymyzy buýsandyrýar. Şeýle-de «Galkynyş» milli at üstündäki oýunlar topary ýurdumyzda ýaýbaňlandyrylýan dabaralarda, şanly seneler mynasybetli guralýan medeni-köpçülikleýin çärelerde çykyş edip, olaryň ähmiýetini we derejesini belende göterýär.
ÝATDAN ÇYKMAJAK PURSATLARY BAGYŞLADY
Döredilýän şeýle giň mümkinçiliklerden ruhlanyp, halkara we bütindünýä festiwallarynyň ençeme gezek ýeňijisi «Galkynyş» milli at üstündäki oýunlar topary 17 — 26-njy ýanwar aralygynda Monakonyň Monte-Karlo şäherinde geçirilýän, dünýäniň dürli ýerlerinden 150-den gowrak sirk artistini bir ýere jemlän 47-nji sirk festiwalynyň çäklerinde-de üstünlikli çykyş etdi. Toparyň çykyşlarynda çeýelik, gözellik hem-de ussatlyk bir bitewi sazlaşygy emele getirdi. Aýratyn-da, «Türkmen milli at üstündäki oýunlary» diýen çykyş ilkinji pursatlardan tomaşaçylaryň ünsüni özüne çekdi. Ajaýyp ahalteke bedewleri, artistleriň milli lybaslary, atlylaryň sazlaşykly hereketleri, bedewleriň aýlaw boýunça hereketiniň tizligi, iň çylşyrymly tilsimleriň ýerine ýetirilişiniň ýokary derejesi bu ýere ýygnanan sirk sungatynyň muşdaklaryna ýatdan çykmajak pursatlary bagyşlady.
.jpg)
47-nji HALKARA SIRK FESTIWALYNDAN JEMI 5 BAÝRAK!
Netijede, Monte-Karloda geçirilýän bu abraýly 47-nji halkara sirk festiwalynda «Galkynyş» milli at üstündäki oýunlar toparymyz Baş baýraga mynasyp boldy. Şeýle-de toparyň agzalaryna ýaş ýetginjek eminleriň ýokary bahasyny we festiwalyň tomaşaçylarynyň söýgüsini gazanandygy bilen bagly baýraklar gowşuryldy. Italiýanyň «Moira Orfei», Hindistanyň «Rambo» sirkiniň ýörite baýraklary hem şol sylaglaryň üstüni ýetirdi. Şeýlelikde, ýaşyl Tugumyzy nobatdaky gezek belende göteren «Galkynyş» toparynyň agzalary ata Watanymyza halkara sirk festiwalyndan jemi 5 baýrak bilen dolanyp gelerler.
AKHAN — TÄZE ÜSTÜNLIKLERIŇ NYŞANY
Esasy bellemeli zat, Türkmenistanyň ussat halypa seýsi hormatly Arkadagymyzyň hut özüniň seýislän Akhan atly bedewiniň üstünligi ahalteke bedewleriniň şöhratyny has-da artdyrdy. Mälim bolşy ýaly, Türkmenistanyň Prezidentiniň Ahalteke atçylyk toplumyna degişli Akhan atly bedewiň iki aýagynyň üstünde çarpaýa galyp, 10 metr aralyga görkezen netijesi Ginnesiň rekordlar kitabyna girizildi. Akhan 10 metr aralyga 4,19 sekunt wagt sarp edip, şondan ozalky iň gowy netijäni iki esse gowulandyrdy. Munuň özi Milli Liderimiziň ägirt uly yhlasynyň, seýisçilik tejribesiniň aýdyň beýanyna öwrüldi. Gahryman Arkadagymyzyň 2009-njy ýylda Akhany «Galkynyş» milli at üstündäki oýunlar toparyna sowgat bermegi şöhratly bedewiň täze üstünliklerine ýol açdy. Şeýlelikde, bu toparyň Monte-Karlodaky belent üstünligi hormatly Arkadagymyzyň atçylyk sportuny ösdürmek boýunça başlangyçlarynyň häzirki wagtda hormatly Prezidentimiziň parasatly baştutanlygynda üstünlikli durmuşa geçirilýändiginiň subutnamasydyr.
«GALKYNYŞ» MILLI AT ÜSTÜNDÄKI OÝUNLAR TOPARY DÜNÝÄ SAHNASYNDA:
■ Ýurdumyzyň sirk sungatynyň ösüşinde möhüm orny bolan bu topar halkara sirk festiwallarynda 5 gezek baş baýraga mynasyp boldy.
■ «Galkynyş» topary sirk sungaty boýunça ilkinji Baş baýragyny 2013-nji ýylda Russiýa Federasiýasynyň Moskwa şäherinde geçirilen «IDOL» bütindünýä sirk sungaty festiwalynda gazanmagy başardy.
■ 2014-nji ýylda Italiýanyň Latina şäherinde geçirilen XVI Halkara sirk festiwalynda, 2015-nji ýylda Hytaý Halk Respublikasynda guralan II Halkara sirk sungaty festiwalynda Baş baýraklary eýeledi.
■ «Galkynyş» topary 2016-njy ýylda Gyrgyz Respublikasynyň Çolpon-Ata şäherinde geçirilen Çarwadarlaryň II bütindünýä oýunlarynda Baş baýraga mynasyp boldy.
■ Bu toparyň 2018-nji ýylda Russiýa Federasiýasynyň Sankt-Peterburg şäherinde ilkinji gezek geçirilen Fontankadaky I Halkara sirk sungaty festiwalynda «Altyn Gaetano» altyn heýkeljigine mynasyp bolmagy Türkmenistanyň halkara sport abraýyny belende göteren şatlykly waka boldy.
“Nesil” gazeti.
