Ýakynda Türkmenistanyň Magtymguly adyndaky Ýaşlar guramasynyň Ahal welaýat Geňeşiniň, welaýatyň beýleki jemgyýetçilik guramalarynyň hem-de Medeniýet müdirliginiň bilelikde guramagynda Ak bugdaý etrabynyň Nowruz ýaýlasyndaky «Türkmeniň ak öýi» binasynda «Eneleriň arzuwy — dünýä dursun parahat!» atly aýdym-sazly dabara geçirildi. Halkara zenanlar güni mynasybetli geçirilen baýramçylyk dabarasyna welaýatymyzyň gelin-gyzlary uly höwes we ruhubelentlik bilen gatnaşdylar.
Dabaradaky gutlag çykyşlarda ýurdumyzda Halkara zenanlar gününiň giňden dabaralandyrylmagynyň ähmiýeti, zenanlara goýulýan hormat-sarpa, zenanlaryň jemgyýetimizdäki orny barada täsirli gürrüň edilip, bu gün gelin-gyzlaryň bilim almagy, hünär öwrenmegi, Watanymyzyň ösüşlerine mynasyp goşant goşmagy ugrunda döredilýän giň mümkinçilikler hakda aýratyn durlup geçildi hem-de munuň üçin Gahryman Arkadagymyzyň, Arkadagly Gahryman Serdarymyzyň adyna tüýs ýürekden çykýan alkyşlar aýdyldy.
Welaýatymyzyň medeniýet we sungat ussatlarynyň aýdym-sazly çykyşlary, tanslarydyr degişme sahnalary dabaranyň şowhunynyň has-da artmagyna getirip, zenanlaryň baýramçylyk şatlygyny goşalandyrdy. Dabaranyň ahyrynda öňdebaryjy zenanlara jemgyýetçilik guramalary tarapyndan baýramçylyk sowgatlary gowşuryldy.
Jeýhun SAPARGULYÝEW,
Türkmenistanyň Magtymguly adyndaky
Ýaşlar guramasynyň Ahal welaýatynyň
Ak bugdaý etrap Geňeşiniň başlygy.
