Sporta berilýän ünsüň ýyl-ýyldan ýokarlanmagy, Watanymyzyň sportuň gülläp ösýän mekanyna öwrülmegine ýardam berýär. Gahryman Arkadagymyzyň baştutanlygynda «Aşgabat 2017» oýunlarynyň ýokary derejede geçirilmegi Diýarymyzyň sport ýurdy hökmünde dünýä tanalmagyna ýardam berdi. Bu ýyl bolsa, paýtagtymyzyň Olimpiýa şäherçesi Agyr atletika boýunça dünýä çempionatyny garşylar. Bu bolsa ýurdumyzda sporta berilýän ünsüň näderejede ýokarydygy barasynda aýdanlarymyzyň aýdyň mysalydyr. Üns merkezinde saklanýan sport görnüşleriniň biri hem agyr atletika bolup, sportuň bu görnüşi bilen meşgullanmakda döredilýän ýokary mümkinçilikler aýdyň netijesini berýär.
Ýakynda Özbegistanyň Ürgenç şäherinde ýetginjekleriň we ýaşlaryň arasynda Agyr atletika boýunça Aziýa çempionaty geçirildi. Çempionatda türkmen türgenleriniň görkezen oňat netijeleri, ylaýta-da, Ýaş olimpiýaçylary taýýarlaýyş mekdebiniň 10-njy synp okuwçysy Reýimbergen Jumaýewiň ýeňşi hemmämizi buýsandyrdy. Sportuň agyr atletika görnüşi boýunça 60 kilogram agramda çykyş edýän ýaş türgen silkip götermekde 110 kilogram, itekläp götermek boýunça 133 kilogram agyrlyga hötde gelmek bilen I orna, çempionatyň altyn medalyna mynasyp boldy.
Ýaş türgeniň aýtmagyna görä, ol ýedi ýaşyndan bäri bu görnüş bilen meşgullanyp gelýär. Ilkinji tälimçisi Matýakup Jumaýewiň türgenleşdirip başlamagynda geljekki agyr atletikaçy bu ugra ykbalyny baglaýar. Dynuwsyz türgenleşip, arman-ýadaman bu ugruň aýratynlyklaryny öwrenip başlan Reýimbergen dürli ýyllarda ýurdumyz boýunça geçirilýän ýaryşlarda ýokary netijeleri gazanmagy başarýar. Ol golaýda Aşgabat şäheriniň açyk birinjiligini almak ugrunda 2001-nji ýylda doglan türgenleriň arasynda geçirilen ýaryşda birinji orna mynasyp boldy. Ýokary netijeleri gazanmagynda tälimçileri Mansur Rejebowyň we Meretguly Sähetmyradowyň aýratyn ornunyň bardygyny aýdýan ýaş türgen, şu ýylyň oktýabr aýynda Argentinada ýetginjekleriň arasynda geçiriljek olimpiada taýýarlanýar. Biz hem ýaş türgene üstünlik, halkara sport ýaryşlarynda ýurdumyzyň abraýyny goramagyny arzuw edýäris.
Bezirgen ATAÝEW,
Türkmenistanyň Magtymguly adyndaky Ýaşlar guramasynyň
Merkezi Geňeşiniň baş hünärmeni.
“Nesil” gazeti,
15.05.2018ý.
