Berkarar döwletiň täze eýýamynyň Galkynyşy döwründe ýurdumyz Birleşen Milletler Guramasynyň düzümleri, şol sanda onuň Bilim, ylym we medeniýet meseleleri boýunça guramasy — ÝUNESKO bilen hyzmatdaşlyga aýratyn ähmiýet berýär. Garaşsyz, hemişelik Bitarap Türkmenistan 1993-nji ýyldan bäri ÝUNESKO-nyň doly hukukly agzasy bolmak bilen, onuň bilen hyzmatdaşlygy barha işjeňleşdirýär. Şonuň bilen baglylykda, ýurdumyzda bu guramanyň maksatlaryny durmuşa geçirmekde, şeýle-de medeni, bilim we ylym kuwwatyny artdyrmakda uly üstünlikler gazanyldy. Muňa ÝUNESKO-nyň Bütindünýä mirasynyň we Adamzadyň maddy däl medeni mirasynyň abraýly sanawyna girizilen gymmatlyklar hem aýdyň şaýatlyk edýär.
Gözel Diýarymyzyň çägindäki taryhy-medeni ýadygärlikleriň birnäçesiniň, şol sanda Gadymy Merwiň, Köneürgenjiň we Gadymy Nusaý galasynyň ÝUNESKO-nyň Bütindünýä mirasynyň sanawyna girizilendigi buýsanç bilen bellenilmelidir.
Häzirki wagtda ýurdumyzyň milli gymmatlyklaryny ÝUNESKO-nyň Adamzadyň maddy däl medeni mirasynyň sanawyna girizmek boýunça alnyp barylýan giň göwrümli işler ýokarda agzalan sanawyň has-da giňejekdiginden habar berýär.
Aýjahan ÇALIKOWA,
Türkmenistanyň Magtymguly adyndaky
Ýaşlar guramasynyň Ahal welaýat
Geňeşiniň esasy hünärmeni.
