Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň hem-de Türkmenistanyň Senagatçylar we telekeçiler partiýasynyň Arkadag şäheriniň komitetiniň bilelikde guramagynda Gahryman Arkadagymyzyň ýolbaşçylygynda geçirilen Halk Maslahatynyň Prezidiumynyň mejlisinden gelip çykýan wezipeleri wagyz etmek, halk demokratiýasynyň dabaralanmagyna ýaş nesilleriň işjeň gatnaşmagyny gazanmak maksady bilen «Halk Maslahaty – döwletlilik ýoly» atly «tegelek stoluň» başyndaky söhbetdeşlik geçirildi. Baý mazmuna eýe bolan çykyşlarda 20-nji awgustda geçirilen Halk Maslahatynyň Prezidiumynda garalan meseleler, öňe sürlen teklipler, şol sanda Türkmenistanyň Halk Maslahatynyň nobatdaky Mejlisine görülýän taýýarlyk işleri dogrusynda täsirli gürrüňler edildi.
Bellenilişi ýaly, biziň ýurdumyzda Berkarar döwletiň täze eýýamynyň Galkynyşy döwründe halk bähbidine gönükdirilýän döwletli işlere halka geňeşilip badalga berilýär. Häzirki döwürde mähriban Watanymyzda şöhratly pederlerimiziň döwletli işleri halk bilen geňeşip çözmek bilen bagly milli däpleri döwrebap derejede mynasyp dowam etdirilýär.
Halk Maslahaty — bu pähim-paýhasyň, halk akylynyň, jemgyýet bähbitleriniň jemlenýän ýeridir. Bu giňden pikir alyşylýan, jemgyýetiň dürli gatlaklarynyň sesini diňlemäge niýetlenen uly maslahatdyr. Hut şu nukdaýnazardan Halk Maslahatynyň nobatdaky Mejlisine şu günlerden uly taýýarlyk işleri guramaçylykly alnyp barylýar.
Şeýle hem söhbetdeşligiň barşynda bu taryhy maslahata ýaşlaryň işjeň gatnaşmagyny gazanmak maksady bilen ýerine ýetirilýän işler barada hem uly buýsanç bilen bellenildi hem-de döwletli işleri durmuşa geçirýän Gahryman Arkadagymyza, Arkadagly Gahryman Serdarymyza alkyş sözleri aýdyldy.
Umyda KAKAÝEWA,
Türkmenistanyň Magtymguly adyndaky
Ýaşlar guramasynyň Arkadag şäheriniň
Geňeşiniň Guramaçylyk bölüminiň müdiri.
