Ýakynda Türkmenistanyň Magtymguly adyndaky Ýaşlar guramasynyň Aşgabat şäheriniň Bagtyýarlyk etrap Geňeşiniň hem-de Aşgabat şäher Baş bilim müdirliginiň bilelikde guramagynda Aşgabat şäheriniň daşary ýurt dillerini, takyk, tebigy dersleri çuňlaşdyryp öwredýän ýöriteleşdirilen 140-njy orta mekdebinde etrabyň çäginde ýerleşýän orta mekdepleriniň döredijilik bilen meşgullanýan okuwçylarynyň gatnaşmagynda Türkmenistanyň Bilim ministrligi, Türkmenistanyň Parahatçylyk gaznasynyň müdirýeti, Türkmenistanyň Magtymguly adyndaky Ýaşlar guramasynyň Merkezi Geňeşi, “Güneş” žurnaly tarapyndan ýurdumyzyň umumybilim berýän mekdepleriniň 4-12-nji synplarynda okaýan okuwçylarynyň arasynda “Parahatçylyk: çagalaryň sesi” atly döredijilik bäsleşiginiň Bagtyýarlyk etrap tapgyry geçirildi.
Bäsleşikde “Dünýä dursun parahat!” diýen temada ýazan düzmeleri, çeken suratlary we maketleriniň görnüşleri boýunça zehinli çagalar öz döredijilik ukyplaryny görkezdiler. Täsirli geçen bäsleşigiň ahyrynda ýeňiji bolanlara we oňa gatnaşan zehinli okuwçylara Türkmenistanyň Magtymguly adyndaky Ýaşlar guramasynyň Aşgabat şäheriniň Bagtyýarlyk etrap Geňeşi tarapyndan Hormat hatlary hem-de ýadygärlik sowgatlary dabaraly ýagdaýda gowşuryldy.
Çäräniň ahyrynda oňa gatnaşanlar ýurdumyzyň ösüşi ugtunda döwletimizde durmuşa geçirilýän beýik özgertmeler üçin Gahryman Arkadagymyzyň, Arkadagly Gahryman Serdarymyzyň adyna alkyş sözlerini beýan etdiler.
Rüstem MÄMMEDOW,
Türkmenistanyň Magtymguly adyndaky Ýaşlar guramasynyň
Aşgabat şäheriniň Bagtyýarlyk etrap Geňeşiniň başlygy.
