Şu gün Türkmenistanyň Medeniýet ministrliginiň we Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikde guramagynda Türkmenistanyň Medeniýet merkeziniň Mukamlar köşgünde «Dutar ýasamak senetçiligi, dutarda saz çalmak we bagşyçylyk sungaty» ady bilen yglan edilen bäsleşigiň jemleýji tapgyry geçirildi.
Diňleýjiniň kalbyna aram berýän türkmen milli dutar saz guralynyň ýasalyş usullaryny, tärlerini, bu ugurdaky halk tejribesini öwrenmek, dutarda dürli ýerine ýetirijilik ugurlaryny, däplerini ösdürmek, halk arasynda ussat sazandalaryň, bagşylaryň we senetkärleriň baý tejribesini özünde jemleýän ýaş zehinleri ýüze çykarmak, halkymyzyň baý mirasyny wagyz etmek we dutar ussalarynyň hünär ussatlygyny, döredijilik ukybyny kämilleşdirmek maksady bilen geçirilen bu çäre hormatly Prezidentimiziň: «Türkmen halky milli öwüşginlere baý medeniýeti, täsin heňlere, owaza eýlenen aýdym-sazy, folklory, sungat derejesine ýetirilen zergärçiligi, külalçylygy bilen ynsan kowumynyň gymmatlyklaryna uly goşant goşandyr» diýen parasatly sözlerinden ugur aldy.
«Türkmenistan – parahatçylygyň we ynanyşmagyň Watany» ýylynda uly dabara bilen geçirilen bu bäsleşik milli saz sungatymyzyň ösüşine täze öwüşgin çaýmakda, dutar ýasamak senetçiligini ösdürmekde we dutarda saz çalmagyň, aýdym aýtmagyň hem-de ýerine ýetirmegiň gadymy nusgalaryny ýüze çykarmakda möhüm ähmiýete eýe bolup, Berkarar döwletimiziň bagtyýarlyk döwründe Gahryman Arkadagymyzyň parasatly ýolbaşçylygynda halkymyzyň hiç wagt öz gymmatyny ýitirmejek mirasy bolan milli saz gurallary senetçiligini ösdürmek, ynsana egsilmejek ruhy lezzet berýän milli aýdym-saz sungatymyzy dünýä ýaýmak babatynda durmuşa geçirýän ägirt uly işleriniň aýdyň miwesi boldy.
Ýokary guramaçylykly geçen bu bäsleşige gatnaşyjy ýaşlaryň her biriniň ýerine ýetiren çykyşlarynda, taýýarlan işlerinde halkymyzyň baý medeni we milli mirasyna söýgini, zähmete we senetçiligiň dutar ýasamak görnüşine höwesi, bagtyýar şu günümize beýik buýsanjy görmek bolýar.
Bäsleşik üç ugur – dutar ýasamak senetçiligi, dutarda saz çalmak, bagşyçylyk sungaty ugurlary boýunça geçirildi.
Bäsleşigiň «Dutar ýasamak senetçiligi» ugry boýunça dutar saz guralynyň taýýar görnüşi we dutar saz guralynyň kädisiniň, sapynyň we gapagynyň taslama görnüşi hödürlenildi.
«Dutarda saz çalmak» ugry boýunça bir sany halk sazy we bir sany mukamçy kompozitoryň eseri ýerine ýetirildi.
Şeýle hem bäsleşigiň «Bagşyçylyk sungaty» ugry boýunça bir sany halk aýdymy we bir sany mukamçy kompozitoryň döreden aýdymy ýerine ýetirildi.
Bäsleşigiň ahyrynda bäsleşigiň döwlet tapgyrynda ýeňiji bolanlar Türkmenistanyň Medeniýet ministrliginiň Diplomlary we Türkmenistanyň Magtymguly adyndaky Ýaşlar guramasynyň Merkezi Geňeşiniň gymmat bahaly sowgatlary bilen sylaglandylar. Şeýle hem bäsleşige gatnaşyjylara höweslendiriji baýraklar hem gowşuryldy.
Umyda KAKAÝEWA,
Türkmenistanyň Magtymguly adyndaky Ýaşlar guramasynyň Merkezi Geňeşiniň bölüm müdiri.
