Her bir hakyky döredijilik adamsy öz sungaty bilen ruhy durmuşyň dürlüligini açyp görkezmäge ýykgyn edýär. Ol sungatyň täsin syrlaryna aralaşdygyça ýaşaýyşyň düýp many-mazmunyna akyl ýetirýär. Döredijilik maksadaokgunlylygy, şahsy sungat gözlegleri bilen badaşýan, özboluşly häsiýet we içki ösüş aýratynlyklary, göwün söýen sýužetleri, çuňňur mazmunly äheňleri saýlamak – bularyň hemmesi Türkmenistanyň sungatda at gazanan işgäri Işanguly Işangulyýewiň döredijilik pelsepesini kesgitleýär.
Golaýda Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýinde «Türkmenistan – ÝUNESKO: Diýardan ýaýran ýollar» atly döredijilik sergisi geçirildi. Döredijilik sergisi Türkmenistanyň sungatda at gazanan işgäri Işanguly Işangulyýewiň döredijilik ýoluna bagyşlanyldy.
Bu döredijilik sergisinde ýerleşdirilen eserler özüniň çeperçilik we many taýdan baý mazmuna baýlygy, eserlerde ulanylýan reňkleriň dürlüligi, psihologiki we terbiýeçilik ähmiýetiniň giňligi bilen tapawutlanýar. Bu eserleriň ýene bir aýratynlygy, ýaşlaryň geçmiş, şu gün we geljegine täsir edijilik häsiýetiniň giňligindedir. Işanguly Işangulyýewiň döredijiliginde Watanymyzyň ösüşleri, taryhy wakalaryň gahrymanlary bolan Beýik şahsyýetlerimizi, milli däp-dessurlarymyzy, milli ýörelgelerimiziň waspy taryhy maglumatlara baý eserler öz beýanyny tapýar. Bu bolsa sergä gatnaşyjylaryň aýratynda ýaş nesillerimiziň ruhy we hünär dünýäsine oňaýly täsirini ýetirýär. Bu eserleriň üsti bilen olar geçmiş sahypalarymyza syýahat edýärler. Mundan başga-da eserlerde beýan edilýän daşary ýurt suratlary bolsa, halkara gatnaşyklaryň pugtalanmagyna we ol ýerleriň medeniýetleri bilen ýaş nesilleriň tanyş bolmaklaryna mümkinçilik berýär.
Döredijilik sergisiniň ahyrynda halkymyzyň milli gymmatlyklaryny dünýä ýaýmakda döwletli işleri durmuşa geçirýän mähriban Arkadagymyzyň janynyň sag, ömrüniň uzak bolmagy arzuw edildi.
Şaperi OTUZOWA,
TMÝG-niň Aşgabat şäher geňeşiniň Medeniýet we köpçülikleýin habar beriş bölüminiň hünärmeni.
