Türkmenistanyň Magtymguly adyndaky Ýaşlar guramasynyň Daşoguz welaýatynyň Köneürgenç etrap Geňeşi etrabyň bilim bölümi bilen bilelikde, 15-nji orta mekdebiň ýokary synp okuwçylarynyň gatnaşmagynda, Täze 2023-nji ýyly mynasyp garşylamak, ýaşlaryň arasynda tertip-düzgüniň berk berjaý edilmegini gazanmak maksady bilen, wagyz-nesihat çäresi geçirildi. Çärede ýerli jemgyýetçilik guramalarynyň hem-de hukuk goraýjy edaralarynyň wekilleriniň çykyşlary diňlenildi. Çykyşlarda baýramçylyk döwründe tertip-düzgüni berk berjaý etmeklik dogrusynda giňişleýin gürrüň edildi.
***
Türkmenistanyň Magtymguly adyndaky Ýaşlar guramasynyň Daşoguz welaýat we Daşoguz şäher Geňeşleri, şäheriň gözel künjekleriniň birinde ýerleşýän “Maral” toý mekanynda aýdym-sazly dabaraly çäre geçirdi. Bilim ulgamynda zähmet çekýän ýaşlaryň gatnaşmagynda geçirilen bu dabarada Daşoguzyň Magtymguly Garlyýew adyndaky ýörite sungat mekdebiniň talyp ýaşlarynyň ýerine ýetiren aýdym-sazly çykyşlary, ajaýyp tanslary oňa gatnaşyjylara ruhy lezzet paýlady. Bu dabara uly ruhubelentlige beslendi.
***
Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşi etrabyň bilim bölümi bilen bilelikde, etrabyň 29-njy orta mekdebinde okaýan ýokary synp okuwçylaryň arasynda “Ýaş nesillerimiziň saglygy – döwletimiziň baş baýlygy” atly wagyz-nesihat ýygnagyny geçirdi. Okuwçy ýaşlaryň gyşky dynç alyş döwründe dürli düzgün bozulmalardan daşda durmaklaryny gazanmak, suwly ýaplaryň golaýyna barmazlyk, buzda typmazlyk, ululardan birugsat uzak ýerlere gitmezlik ýaly nogsanlyklara baş goşmaklarynyň öňüni almak maksady bilen geçirilen wagyz-nesihat ýygnagynda etrabyň jemgyýetçilik guramalarynyň işgärleri, etrap bilim bölüminiň hünärmeni, etrap polisiýa bölüminiň kämillik ýaşyna ýetmedikleriň işi baradaky bölümçesiniň gözegçisi, synp ýolbaşçy mugallymlar dürli mysallara ýüzlenmek arkaly giňişleýin hem-de täsirli çykyşlar etdiler.
***
Türkmenistanyň Magtymguly adyndaky Ýaşlar guramasynyň Daşoguz welaýatynyň Akdepe etrap Geňeşi, etrabyň tehniki hyzmat ediş kärhanasynda, Ilkinji Ýaşlar guramasynyň agzalarynyň gatnaşmagynda, “Türkmeniň millilik ýoly dünýä nur saçýar” atly söhbetdeşlik çäresini geçirdi. Bu çäre ruhy-ahlak we medeni gymmatlyklary, milli däp-dessurlarymyzy wagyz etmek, sagdyn durmuş ýörelgelerini kemala getirmek, raýatlylygy, watansöýüjiligi we zähmete söýgüni terbiýelemek maksady bilen geçirildi. Çärede ýerli jemgyýetçilik guramalarynyň wekilleriniň hem-de kärhananyň Ilkinji Ýaşlar guramasynyň agzalarynyň çykyşlary diňlenildi. Çykyşlarda medeni gymmatlyklarymyz, milli däp-dessurlarymyz, sagdyn durmuş ýörelgeleri dogrusynda giňişleýin bellenip geçildi.
