Gahryman Arkadagymyzyň başlangyjy bilen kabul edilen Milli tokaý maksatnamasynyň çäginde, Berkarar döwletiň täze eýýamynyň Galkynyşy döwründe-de daşky gurşawy goramak, tebigy baýlyklary aýawly saklamak we ony rejeli peýdalanmak bilen bagly meseleler Arkadagly Serdarymyzyň baştutanlygynda üstünlikli durmuşa geçirilýär. Soňky ýyllarda suw, ýer we tebigy baýlyklary, biologiki köpdürliligi goramak, çölleşmä garşy göreşmek, ýaşlarda ekologiýa düşünjesini ýokarlandyrmak hem-de howanyň hapalanmagynyň öňüni almak boýunça uly işler alnyp barylýar. Adamlaryň ýaşaýyş-durmuş derejesiniň ýokarlanmagyna, daşky gurşawyň arassalygyna gönükdirilen bu işleriň netijesinde, gözel paýtagtymyzda, ýurdumyzyň çar künjeginde bagy-bossanlyklar, saýaly we miweli agaçlar bilen gurşalan «tokaý zolaklary», ýaşyl seýilgähler döredilýär. Şäher we obalardaky «gök zolaklar» ilatly ýerleri tozanly ýellerden goraýar.
Arkadagly Serdarymyzyň öňdengörüjilikli we oýlanyşykly syýasaty netijesinde ýaşaýan ýerimiziň daşky gurşawynyň goralmagyny, tebigy baýlyklardan rejeli peýdalanylmagyny kesgitleýän kanunçylyk namalarynda berkidilen kadalar eziz Diýarymyzda amala aşyrylýan giň gerimli işleriň aýdyň subutnamasydyr. Tebigaty goramak babatynda alnyp barylýan işleriň hatarynda durmuşa geçirilýän özgertmeler daşky gurşawy goramakda möhüm ähmiýete eýedir. Tebigaty goramak babatda «Ozon gatlagyny goramak hakynda», «Tebigaty goramak hakynda», «Ekologiýa seljermesi hakynda», «Aýratyn goralýan tebigy ýerler hakynda», «Ösümlik dünýäsi hakynda», «Ösümlikleri goramak hakynda», «Ekologiýa auditi hakynda», «Ekologiýa maglumaty hakynda» kanunlaryň kabul edilmegi ýuridiki we fiziki şahslaryň daşky gurşawyň ýagdaýy, tebigy serişdeler barada giňişleýin, dogry maglumatlary öz wagtynda almaklaryna gönükdirilendir.
Berkarar döwletiň täze eýýamynyň Galkynyşy döwründe alnyp barylýan işler adamlaryň ýaşaýyş-durmuş derejesiniň ýokarlanmagyna, daşky gurşawy goramaga gönükdirilen işleriň netijesinde ýaşyl bagy-bossanlyklar, tokaý zolaklary emele gelýär. Ýurdumyzda her ýylyň bahar paslynda geçirilýän köpçülikleýin bag ekmek, ýaş baglara ideg etmek çäreleri bolsa ekologiýa syýasatyna özboluşly goşant bolup durýar. Bu asylly däp ýurdumyzy bagy-bossanlyga öwürmek, tokaý zolaklaryny döretmek ýaly maksatlara gönükdirilendir. Bularyň ählisi ynsan durmuşyny bagçylykdan, tebigy gözelliklerden üzňe göz öňüne getirip bolmaýandygynyň aýdyň subutnamasydyr. Çünki ekologiýa abadançylygy-bagtyýar hem sagdyn ýaşaýşyň kepilidir!
Şirinnabat SARJAGULOWA,
Türkmenistanyň Magtymguly adyndaky
Ýaşlar guramasynyň Balkan welaýatynyň
Türkmenbaşy etrap Geňeşiniň guramaçylyk
bölüminiň müdiri.
