Geldi-geçer bu dünýede,
Ýekelese umytlaryň,
Ýada salyp bir pursatlyk,
Meň barymy unutmagyn.
Bilýän indi ýatlanyňam,
Haýyr etmez ynjan kalba,
Şonda-da sen käte birje,
Ýatla meni, ýada salda.
Ýylgyrarsyň bir pursatlyk,
Gödekligim ýada düşse,
Meň keşbimi ýada salar,
Güýz ýapragy ýere düşse.
Kine etme bu durmuşdan,
Isleýşiň deý, bolmaz bar zat,
Ähli zada başyň ýaýkap,
Ýatla şonda, bolsamam ýat.
Gözden uzak, göwni synyk,
Mähribanyň bardyr seniň.
Ýatlaýaňmy, ýatlaňokmy,
Geçmişiňe ýardyr seniň.
Gunça ORAZOWA,
Daşoguz welaýatynyň Köneürgenç etrabynyň
1-nji sport mekdebiniň tälimçi-mugallymy,
Türkmenistanyň Magtymguly adyndaky
Ýaşlar guramasynyň işjeň agzasy.
