Häzirki wagtda ýurdumyzda sanly ykdysadyýeti ösdürmek boýunça beýik işler amala aşyrylýar. Bu ugurda geljegi nazarlaýan döwlet maksatnamalary üstünlikli durmuşa geçirilip, täze iş orunlaryny döretmek, innowasion, sanly tehnologiýalary ornaşdyrmak boýunça giň gerimli çäreler yzygiderli amala aşyrylýar.
Mälim bolşy ýaly, «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasy» üstünlikli durmuşa geçirilýär. Munuň özi kesgitlenen wezipeleriň üstünlikli ýerine ýetirilýändigini, ykdysadyýetimizi has-da ösdürmekde guwandyryjy işleriň alnyp barylýandygyny aýdyň beýan edýär. Elbetde, sanly ykdysadyýeti ösdürmegiň möhüm ugurlarynyň biri hem hünärmenleriň taýýarlygydyr. Sanly ykdysadyýetiň hünärmen we ylym-bilim üpjünçiligini ösdürmek, tehnologik başlangyçlary we ylmy çözgütleri emele getirmäge şertleri döretmek, maglumat üpjünçilik ulgamyny döretmek ýaly wezipeler hem esasy ugurlaryň biri hökmünde kesgitlenilýär. Ýokary okuw mekdeplerinde bilim alýan ýaşlar öňdebaryjy tehnologiýalary ulanyp, dünýäniň ylmy-tehniki ösüşiniň gazananlaryny ornaşdyryp, täze şertlerde işlemäge ukyply hünärmenler bolup ýetişýärler. Bu gün sanly ykdysadyýet boýunça toplanan dünýä tejribesiniň ylmy taýdan öwrenilmegi ösüşiň sanly ugurlaryny özleşdirmäge we ony ösdürmäge ýardam berýär. Şonuň üçin döwletimiz bu ugurda kabul edilen kadalaşdyryjy-hukuknamalarda we maksatnamalarda daşary ýurt tejribesini nazara alyp, anyk wezipeleri öňde goýýar. Bu bolsa sanly ulgamy ösdürmekde netijeliligi hem-de toplumlaýyn işleriň durmuşa geçirilmegini üpjün edýär.
Sanly maglumat-aragatnaşyk tehnologiýalarynyň peýdalanylmagyna esaslanýan ykdysady gatnaşyklaryň ulgamyny öz içine alýan sanly ykdysadyýetiň ýörelgeleri bu gün maksatnamalaýyn ornaşdyrylýar. Bu babatda hususy ulgamda alnyp barylýan işleri hem görkezmek bolar. Hususy ulgamyň mümkinçilikleri has-da giň bolup, bu babatda sanly ulgamy ösdürmekde möhüm ugurlara üns bermek uly ähmiýete eýe bolýar. Esasan hem harytlary öndürmekde, elektron senagatyny ösdürmekde hususy ulgam örän uly işjeňlik görkezýär. Şonuň üçin hem milli ykdysadyýetimizde telekeçiligiň tutýan orny has-da ösdürilýär. Bu ugurda hususy ulgamyň uly mümkinçiliklere eýe bolmagy bilen sanly tehnologiýalary ösdürmäge hem öz goşantlaryny goşýarlar.
Ýurdumyzy durmuş-ykdysady taýdan ösdürmekde durmuşa geçirilýän möhüm işler belent üstünliklere beslenýär. Berkarar döwletiň täze eýýamynyň Galkynyşy döwründe ykdysadyýetde, syýasatda we medeni ulgamda alnyp barylýan döwletli işler biziň her birimizi buýsandyrýar, döredijilikli işlemäge ruhlandyrýar. Ýurdumyzy beýik ösüşler bilen öňe alyp barýan Gahryman Arkadagymyzyň, Arkadagly Gahryman Serdarymyzyň janlary sag bolsun, beýik işleri üstünliklere beslensin!
Hajymyrat MUHAMMETORAZOW,
Türkmenistanyň Telekommunikasiýalar we
informatika institutynyň 4-nji ýyl talyby.
