Çuňňur hormatlanylýan Türkmenistanyň Prezidenti!
Sizi dünýä jemgyýetçiliginde giňden bellenilýän Şäherleriň bütindünýä gününde ýurdumyzyň başlangyjy bilen Aşgabat şäheriniň «Dizaýn» ugry boýunça Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) döredijilik şäherleriniň toruna girizilmegi baradaky hoş habaryň gelip gowuşmagy mynasybetli Türkmenistanyň Halk Maslahatynyň adyndan tüýs ýürekden, mähirli gutlaýaryn. Siziň janyňyzyň sag, ömrüňiziň uzak bolmagyny, parahatçylyk söýüjilik, dost-doganlyk, hoşniýetlilik ýörelgelerine esaslanýan döredijilikli daşary syýasatyňyzyň mundan beýläk hem rowaçlyga beslenmegini arzuw edýärin.
Hormatly Arkadagly Gahryman Serdarymyz!
Garaşsyz, hemişelik Bitarap ýurdumyzyň paýtagty Aşgabat şäheri — Watanymyzyň ýüregi. Ýurdumyzyň dünýä jemgyýetçiligindäki ornuny, at-abraýyny görkezýän parahatçylygyň, hyzmatdaşlygyň merkezi. Paýtagtymyz — dünýäniň ykdysady taýdan ösen, medeni taýdan ýokary derejeli, iň gözel şäherleriniň biri. Berkarar döwletiň täze eýýamynyň Galkynyşy döwründe ak mermerli paýtagtymyzyň «Dizaýn» ugry boýunça Birleşen Milletler Guramasynyň Bilim, ylym we medeniýet meseleleri boýunça guramasynyň döredijilik şäherleriniň toruna girizilmegi bolsa Aşgabadyň dünýä jemgyýetçiligindäki halkara abraýynyň aýdyň beýanyna öwrüldi.
Belent mertebeli Prezidentimiz!
Türkmen halky dünýä medeniýetiniň baýlaşmagyna, kämilleşmegine täsir eden maddy we ruhy gymmatlyklary bilen giňden meşhurdyr. Siziň baştutanlygyňyzda ösüşlere beslenýän zamanamyzda taryhy-medeni mirasymyzyň umumadamzat ähmiýetli nusgalarynyň dünýä medeniýetinde tutýan ornuny ebedileşdirmekde möhüm işler işjeň alnyp barylýar. 1993-nji ýyldan bäri Birleşen Milletler Guramasynyň Bilim, ylym we medeniýet meseleleri boýunça guramasynyň doly hukukly agzasy bolan Garaşsyz, hemişelik Bitarap döwletimiz bu gurama bilen hyzmatdaşlyga uly ähmiýet berýär. Häzirki wagtda türkmen halkynyň maddy we ruhy medeniýetiniň köp sanly desgalary hem-de gymmatlyklary ÝUNESKO-nyň sanawyna girizildi. Ýola goýlan netijeli hyzmatdaşlygyň hukuk binýady hem yzygiderli berkidilýär. Türkmenistan Birleşen Milletler Guramasynyň Bilim, ylym we medeniýet meseleleri boýunça guramasynyň köp sanly konwensiýalaryny tassyklady.
Sarpasy belent Prezidentimiz!
Garaşsyz döwletimiziň paýtagty ak mermerli Aşgabat «Aziýanyň merjen şäheri» diýen ykrarnama eýe boldy hem-de dünýäniň iň owadan, ýaşamak üçin amatly şäherleriniň birine öwrüldi. Şäheriň binagärlik keşbini döwrebaplaşdyrmak, gözel paýtagtymyzy bagy-bossanlyga öwürmek, täze ýaşaýyş toplumlaryny gurmak, hereket edýän inženerçilik-tehniki ulgamlarynyň durkuny täzelemek boýunça giň gerimli işler durmuşa geçirilýär. Paýtagtymyzda özboluşly çözgütleriň amala aşyrylmagy, täzeçil, şol sanda sanly tehnologiýalaryň ornaşdyrylmagy möhüm ähmiýete eýedir.
Milli öwüşginli, taryhy hem-de medeni gymmatlyklary özünde jemleýän köp sanly desgalarynyň halkara derejede mynasyp ykrarnama eýe bolmagy paýtagtymyzyň dünýäniň iň owadan şäherleriniň hatarynda öz ornuny pugtalandyrýandygynyň aýdyň güwäsidir. Munuň şeýledigine şäheriň birnäçe desgalarynyň binagärlik aýratynlygy boýunça Ginnesiň rekordlar kitabynda orun almagy hem doly şaýatlyk edýär. Aşgabadyň ösdürilmegi, uzak möhletli geljegi nazara almak bilen, onuň düzüminiň kämilleşdirilmegi, Arkadagly Gahryman Serdarymyz, Siziň täze taryhy döwrümizde üstünlikli durmuşa geçirýän şähergurluşyk syýasatyňyzyň esasy ugurlarynyň biridir. Tanalmaz derejede özgerýän paýtagtymyzyň häzirki keşbinde Garaşsyz döwletimiziň durmuş-ykdysady taýdan okgunly ösüşi, köpugurly kuwwaty, mähriban halkymyzyň baý taryhy we medeni däpleri öz beýanyny tapýar. Paýtagtymyzda gözellik we amatlylyk, binagärligiň, inženerçilik-tehniki pikiriň öňdebaryjy gazananlary, milli binagärligiň gadymdan gelýän däpleri hem-de türkmenleriň ýaşaýyş-durmuşynyň aýratynlyklary sazlaşykly utgaşýar. Geljegi uly bolan «Aşgabat-siti» taslamasynyň hem Aşgabadyň binagärlik keşbini täze derejelere göterjekdigine berk ynanýaryn.
Hormatly Arkadagly Gahryman Serdarymyz!
Sizi Aşgabat şäheriniň «Dizaýn» ugry boýunça Birleşen Milletler Guramasynyň Bilim, ylym we medeniýet meseleleri boýunça guramasynyň döredijilik şäherleriniň toruna girizilmegi mynasybetli Türkmenistanyň Halk Maslahatynyň adyndan ýene-de bir gezek tüýs ýürekden, mähirli gutlaýaryn. Siziň janyňyzyň sag, ömrüňiziň uzak bolmagyny, il-ýurt bähbitli, umumadamzat ähmiýetli taryhy başlangyçlaryňyzyň we döwletli tagallalaryňyzyň mundan beýläk-de rowaçlyga beslenmegini arzuw edýärin.
Sizi hormatlamak bilen,
Türkmen halkynyň Milli Lideri,
Türkmenistanyň Halk Maslahatynyň Başlygy,
Gahryman Arkadag Gurbanguly Berdimuhamedow.
(TDH)
