Arkadag Serdarly bagtyýar ýaşlar ýylynda Mary şäherinde geçiriljek Merkezi Aziýa ýurtlarynyň we Hytaý Halk Respublikasynyň ýaşlarynyň “Beýik Ýüpek ýolunyň täze eýýamy” atly forumyna gatnaşjak Täjigistan Respublikasynyň wekili Aşgabat Halkara howa menziline gelip gondy.
Myhmanlary forumyň guramaçylary ýagny, Türkmenistanyň Magtymguly adyndaky Ýaşlar guramasynyň Merkezi Geňeşiniň jogapkär işgärleri we meýletinçi toparlary tarapyndan mähirli garşylandy.
Bilşimiz ýaly, 2023-nji ýylyň 16 – 18-nji noýabry aralygynda ýurdumyzyň Mary şäherinde Merkezi Aziýa ýurtlarynyň we Hytaýyň ýaşlarynyň “Beýik Ýüpek ýolunyň täze eýýamy” atly forumy geçiriler.
Bu foruma Türkmenistanyň, Gazagystan, Gyrgyz, Täjigistan, Özbegistan Respublikalarynyň we Hytaý Halk Respublikasynyň ylym, bilim, medeniýet, sungat, parlament ulgamlarynyň ýaş wekillerini, Merkezi Aziýa ýurtlarynyň we Hytaýyň durnukly ösüş maksatlarynyň ilçileri gatnaşlar.
Forumyň ilkinji gününde "Beýik Ýüpek ýolunyň täze eýýamy" atly forumy umumy mejlisi, bölümçeleri we wekiliýetleriň ýolbaşçylarynyň ikitaraplaýyn duşuşyklary geçiriler.
Ikinji gününde “Merkezi Aziýada we Hytaý Halk Respublikasynda ýaşlar syýasatynyň derwaýys meseleleri” atly işewürlik ertirligi, yzýanyndan bolsa “Akwarium” görnüşdäki maslahat geçiriler.
Türkmenistanyň Magtymguly adyndaky Ýaşlar guramasynyň döredilen güni mynasybetli geçirilýän Ýaşlar baýragynyň gowşurylyş dabarasy hem bu ýyl Mary welaýatynda geçirilýär. Günüň ikinji ýarymynda welaýatyň Kemine adyndaky döwlet drama teatrynda geçiriljek dabara daşary ýurtly myhmanlar hem gatnaşar.
Dabaranyň üçünji we jemleýji gününde bolsa Baýramaly şäherine “Gadymy Merw” döwlet taryhy-medeni goraghanasyna gezelenç gurnalar. Myhmanlar ÝUNESKO-nyň Bütindünýä medeni mirasynyň sanawyna goşulan gymmatlyklar bilen ýakyndan tanyşdyrylar.
Forumyň jemleýji gününiň ikinji ýarymynda bolsa gatnaşyjy ýurtlaryň wekilleriniň çykyş etmeklerinde medeniýet festiwaly geçiriler.
Foruma gatnaşmaga gelen Täjigistan Respublikasynyň wekiliýetleri Mary şäherine ugramazdan ozal paýtagtymyz Aşgabat şäheriniň binagärlik gözelliklerini, muzeýlerini gezip görmäge mümkinçilikleri bolar.
Ertir bolsa paýtagtymyz Aşgabat şäherimize foruma gatnaşmak üçin Gazagystan, Gyrgyzystan we Hytaý Halk Respublikalarynyň wekiliýetleri gelerler.
Gurbanmyrat MUHAMMEDOW,
Türkmenistanyň Magtymguly adyndaky
Ýaşlar guramasynyň Merkezi Geňeşiniň
bölüm müdiri.
