Üç ýüz altmyş erenli, myhmansöýer il bilen,
Sahawatly-keremli, urpak-urpak çöl bilen,
Tirkeş-tirkeş kerwenli, Beýik ýüpek ýol bilen
Diýardan ýaýran ýollar - diýara gelýän ýollar.
Berkden tutup goragyn, hüşgär saklap her göçün,
Bak, depäñe garagyn, gökde gaýýar ak laçyn,
Bir tarapy Garagum, bir tarapy Çyn-Maçyn,
Diýardan ýaýran ýollar - diýara gelýän ýollar.
Elkyssaly boý-boýlap, Görogly beg söýlemiş,
Nowruz baýramyn toýlap, ýedi tagam paýlamyş,
Küşt depip gazal çekip, ýer ýüzüne aýlanmyş,
Diýardan ýaýran ýollar - diýara gelýän ýollar.
Nagyş salyp iňňede, tebigatyñ keşbinden,
El hünärli senede, gelin-gyzlañ kesbinden,
Ýer ýüzüne dünýäde halylary keşt eden,
Diýardan ýaýran ýollar - diýara gelýän ýollar.
Çal bagşy, çal dutary, diñlesin halklañ bary,
Pyragyñ kalp ykrary, bir döwlet berkarary,
Geçmişden arşa sary, göterilen hak nury,
Diýardan ýaýran ýollar - diýara gelýän ýollar.
Bu bagtyýar durmuşda ýaşaýyş has özgerýär,
Indi täze görnüşde, dostluk ýollar utgaşýar,
Ösýär täze röwüşde ulag ýollar üstaşyr,
Diýardan ýaýran ýollar - diýara gelýän ýollar.
Dünýäni baglan çawy, mirasymyz dünýewi,
Artyp barýar ýaýrawy, ÝUNESKO-da sanawy,
Peder ýoly ündewi, Beýik ynsan goldawy,
Diýardan ýaýran ýollar - diýara gelýän ýollar.
Annatuwak KAKAÝEWA,
Köneürgenç etrap merkezi kitaphanasynyň direktory,
Türkmeniň “Altyn asyry” bäsleşiginiň ýeňijisi,
“Türkmenistanyň at gazanan medeniýet işgäri”.
