Adaty karate – çagalaryň, ýetginjekleriň eý görýän sport görnüşleriniň biri. Gündogaryň başa-baş söweş sungatynyň bu ugry biziň sport mekdebimizde hem hereket edip, ýaş türgenler sportuň bu görnüşiniň inçe syrlaryny ele alýarlar. Tälimçi-mugallym Döwlet Berdiýewiň ýolbaşçylygynda yhlasly türgenleşip, geçirilýän dürli derejeli ýaryşlarda baýrakly orunlara mynasyp bolýarlar.
Ýaş karateçilerimiz ýakynda Täze zaman ýaşaýyş toplumynyň sport zalynda ýörite meýilnama esasynda geçirilen Türkmenistanyň Kubogy ugrundaky ýaryşda hem üstünlikli çykyş etdiler. Şahsy katada Yhlas Annagurbanow, Goçmyrat Gurbanberdiýew, Nurgeldi Annagurbanow, Yslam Ulugbekow öz agramlarynda ýeňiji boldular. Kerim Allamyradow ikinji orny eýeledi. Toparlaýyn tutluşykda Ýagmyrmyrat Sähetmyradow bilen Kerim Amanow öňdäki orna mynasyp boldy.
Baýrakly orunlary eýelän türgenler Hormat hatlarydyr baýraklar bilen sylaglandylar.
Rahym AGAÝEW,
Aşgabat şäheriniň bedenterbiýe we sport baradaky
Baş müdirliginiň 1-nji sport mekdebiniň müdiri.
* * *
Golaýda Türkmen döwlet bedenterbiýe we sport institutynyň köpugurly sport toplumynyň sport zalynda karatedo boýunça Türkmenistanyň Kubogy ugrunda ýaryş geçirildi. Ýaryşda welaýatlaryň sport mekdepleriniň oglan-gyzlary dürli agramlar boýunça çykyş etdiler. Aşgabat şäheriniň bedenterbiýe we sport baradaky Baş müdirliginiň 5-nji sport mekdebiniň tälimçi-mugallymy A.Ýoldaşowyň şägirtleri hem dürli agramlarda üstünlikli çykyş edip, baýrakly orunlary eýelediler. Olardan Altyn Kulamowa, Medine Gulamowa dagy öňdäki orny eýeledi. Ýaryşda Aýhan Gurbanowa, Muhammetaly Myratgeldiýew hem-de Ýakup Hemraýew dagy hem tapawutlanmagy başardy.
Ýeňiş gazanan türgenlere Diplomlar we gymmat bahaly sowgatlar gowşuryldy.
Atajan ÖWEZNEPESOW,
Aşgabat şäheriniň bedenterbiýe we sport baradaky
Baş müdirliginiň 5-nji sport mekdebiniň müdiri.
* * *
Ýakynda gözel paýtagtymyzda 17 ýaşa çenli ýetginjekleriň arasynda geçirilen grek-rim göreşi boýunça Türkmenistanyň birinjiliginde 6-njy sport mekdebinde tälim alýan birnäçe türgen üstünlikli çykyş edip, baýrakly orunlary eýelemegi başardy. Sport mekdebimiziň tejribeli tälimçi-mugallymy Rozy Rejepowyň şägirtlerinden Atanepes Ataýew (55 kg), Ýusup Guwanjow (65 kg), Dädebaý Aşyrow (80 kg), Aslan Agadadaýew (110 kg) 1-nji, Perhat Çaryýew (45 kg) 2-nji, Gafur Alamanow (45 kg) bolsa 3-nji orunlara mynasyp boldular. Şeýle-de, ussat tälimçi Gasan Rasulowyň ýolbaşçylygynda türgenleşik geçýän türgenlerden Kemal Berdiliýew (71 kg) ýeňiji boldy. Netijede, umumylykda 6-njy sport mekdebiniň türgenleri 5 altyn, 1 kümüş hem-de 1 bürünç medal gazanmagy başardylar.
Bize watansöýüji, sagdyn, ruhubelent ýaş nesilleri terbiýeläp ýetişdirmekde, bagtyýar ýaşlarymyzyň zehin-ukyplaryny açyp görkezmeginde döredip berýän ajaýyp şert-mümkinçilikleri üçin Gahryman Arkadagymyza, Arkadagly Gahryman Serdarymyza çäksiz alkyş aýdýarys.
Keman ATAMYRADOW,
Aşgabat şäheriniň bedenterbiýe we sport baradaky
Baş müdirliginiň 6-njy sport mekdebiniň müdiri.
* * *
Golaýda Aşgabat şäheriniň «Köpetdag» stadionynda sportuň ýeňil atletika görnüşi boýunça Türkmenistanyň Kubogy ugrunda ýaryş geçirildi. Oňa ýurdumyzyň ähli welaýatlaryndan we şäherlerinden ezber türgenler gatnaşdylar.
Çekeleşikli geçen ýaryşda toparlaýyn birinji orna Aşgabat şäheriniň, ikinji ýere Mary welaýatynyň, üçünji orna Lebap welaýatynyň toparlary eýe boldular. Baýrakly orunlary eýelän türgenlere Türkmenistanyň Bedenterbiýe we sport baradaky döwlet komitetiniň Hormat hatlary hem-de ýurdumyzyň Ýeňil atletika federasiýasynyň taýýarlan gymmat bahaly sowgatlary gowşuryldy.
Begmyrat MAKGAÝEW,
Murgap etrap sport mekdebiniň tälimçi-mugallymy.
* * *
Ýurdumyzda mekdep okuwçylarynyň arasynda geçirilmegi asylly däbe öwrülen «Türkmenistan – ruhubelentligiň we sagdynlygyň ýurdy» atly Spartakiadanyň çäklerindäki ýaryşlar gyzgalaňly dowam edýär. Ýakynda Magtymguly etrabynyň bedenterbiýe we sport bölüminiň Türkmenistanyň Magtymguly adyndaky Ýaşlar guramasynyň etrap geňeşi bilen bilelikde guramagynda orta mekdepleriň toparlarynyň arasynda woleýbol bäsleşigi geçirildi.
Çekeleşikli duşuşyklaryň netijesinde baýrak eýeleri belli boldy. Ýaryşa has taýýarlykly gelen 1-nji orta mekdebiň topary öňdäki orny eýeledi. Bäsleşigi 19-njy orta mekdebiň topary 2-nji, 9-njy orta mekdebiň topary bolsa 3-nji orunda jemlediler.
Jeýhun MYRADOW,
Magtymguly etrabynyň bedenterbiýe we sport bölüminiň sport mekdebiniň tälimçi-mugallymy.
«Türkmen sporty» gazeti,
23.12.2023 ý.
