Ýakynda Daşoguz şäherindäki 4-nji sport mekdebinde zenanlaryň arasynda küşt boýunça Türkmenistanyň birinji ligasynyň çempionlygy ugrunda ýaryş geçirildi. Küşt ýaryşlaryna hemişe mahsus bolşy ýaly, bu gezekki çempionat hem garaşylan we garaşylmadyk netijelere baý boldy.
Ýaryşyň ilkinji aýratynlygy çempion bilen baglydyr. Çünki 7 we 9 ýaşa çenli gyzlaryň arasynda 2013-nji ýylda Gresiýada, 2014-nji ýylda-da Braziliýada «Dünýä çempiony» diýen adyň eýesi bolandan soň, esli ýyllap sporta arakesme beren maryly küştçi, FIDE-niň ussady Bägül Ezizowanyň özüni birinji ligada synap görmegi, bu synagyň bolsa çempionlyk bilen tamamlanmagy täsinligiň hut özüdir. Ýaryşda 11 duşuşyk geçiren Bägül 9 utuk toplap, birinji liganyň wekilleriniň arasynda iň ýokary netijäni görkezdi.
FIDE-niň ussatlygyna dalaşgär, lebaply küştçi Leýla Şöhradowa bolsa çempiondan bary-ýogy ýarym utuk yza galyp, 2024-nji ýyldaky üstünlikleriniň üstüne ýene birini goşdy. Ýaryşda üçünji orny Türkmen döwlet bedenterbiýe we sport institutynyň talyby Jennet Durdyýewa eýeledi. Jennet hem lebaply bäsdeşi bilen deň mukdarda utuk toplady. Ýöne käbir görkezijiler boýunça Leýla Şöhradowa bäsdeşinden öňe saýlandy.
Ýaryşy küştçüleriň üçüsi 7,7 utuk bilen tamamlady. Olar 14 ýaşa çenli gyzlaryň arasynda ýurdumyzyň çempiony Jahan Rejebowa (Lebap welaýaty), dürli ýaş derejelerinde birnäçe gezek ýurdumyzyň çempiony bolan Eneş Arazmedowa (Aşgabat şäheri) we ykbalyny sportuň şu görnüşine baglan tälimçi (Lebap welaýaty) Maral Rozyýewadyr. Goşmaça görkezijileriň netijesinde Jahan Rejebowa dördünji, Eneş Arazmedowa bäşinji orna mynasyp görüldi. Farap şäherinde işleýän tälimçi zenan bolsa az sanly görkezijileri boýunça ilkinji bäşlige girip bilmedi.
Ýaryşyň guramaçylary geçen ýyl 15 ýaşa çenli gyzlaryň arasynda geçirilen Aziýanyň çempionatynda kümüş medala mynasyp bolan lebaply küştçi Gülmira Seýilhanowadan hem ýokary netijelere garaşýardylar. Ýöne Maral Rozyýewa bilen geçiren duşuşygynda garaşylmadyk ýalňyşlyk goýberen Gülmira ýokary liga çykmak umydyny indiki ýyllara galdyrmaly boldy. Ol 11 duşuşykda 7 utuk toplap, 52 küştçiniň arasynda ýedinji orny eýeledi.
Ýaryşyň netijeleri boýunça öňdäki orunlary eýelänler bilen bir hatarda, 12 — 18 ýaşa çenli türgenleriň arasynda aýry-aýry ýaş derejeleri boýunça iň ýokary netijeleri gazananlara hem goşmaça baýraklar berildi. Şunda Mary welaýatyndan Jumasoltan Muhammetberdiýewanyň we Lebapdan Mähri Agamyradowanyň goşmaça baýraklara mynasyp bolandygyny aýtmak gerek. Gündogar sebitden Enejan Çarygeldiýewa bolsa şu gezekki ýaryşyň iň kiçi ýaşly wekiline goýlan baýraga mynasyp boldy. Heniz tejribesiniň ýokdugyna garamazdan, ol güýçli bäsdeşleriniň birnäçesinden öňe saýlanyp, 4 utuk bilen 44-nji orny eýelemegi başardy.
Garaşylanyndan pes netije görkezen hem bolsa, Gülmira Seýilhanowa çempiony — Bägül Ezizowany ýeňip, iň gowy oýun üçin goýlan baýragyň eýesi boldy. Şeýle hem eminler Köneürgenç etrabyndan Dünýägözel Rejepmyradowa aýratyn baýragy gowşurdylar. Ol ýaryşa gatnaşanlaryň arasynda mümkinçiligi çäkli ýeke-täk küştçüdir. Muňa garamazdan, Dünýägözel iň güýçlüleriň 35-ligine girmegi başardy.
Düzgünnama laýyklykda, birinji ligada öňdäki bäş orny eýelän küştçi ýakyn günlerde, 3 — 17-nji mart aralygynda paýtagtymyzda geçiriljek ýokary liganyň ýaryşyna gatnaşar. Bu ýerde olar ýurdumyzyň iň güýçli zenan küştçüleriniň sekizisiniň biri bolmak ugrunda göreşerler. Bu hukugy gazanyp bilen küştçüler üstümizdäki ýylda halkara ýaryşlarda ýurdumyza wekilçilik ederler. Ýokary ligada birinji liganyň ýeňijilerine Lala Şöhradowa, Merýem Agajanowa, Ogulsuraý Baýramowa ýaly has güýçli garşydaşlar garaşýar.
Agageldi ITALMAZOW,
«Türkmenistan» gazeti.
