Ýurdumyzda milli mirasymyzy gorap saklamak ugrunda ÝUNESKO bilen bilelikde birnäçe işler alnyp barylýar. 1992-nji ýylda ÝUNESKO tarapyndan döredilen «Dünýä hakydasy» maksatnamasy möhüm we gymmatly resminamalaryň öwezini dolup bolmajak mirasyň ýitip gitmeginiň öňüni almagy, ony gorap saklamaga we halk köpçüligine ýetirmege gönükdirilendir. Magtymguly Pyragynyň golýazmalarynyň ýygyndysy «Dünýäniň hakydasy» maksatnamasynyň halkara sanawyna goşuldy, şeýle hem ÝUNESKO-nyň Baş konferensiýasynyň 42-nji mejlisiniň dowamynda 2024-2025-nji ýyllarda ÝUNESKO bilen bilelikde bellenip geçiljek şanly seneleri tassyklamak boýunça kararnama kabul edilip, ol kararnamada döwlet Baştutanymyzyň goldawy bilen, Türkmenistan tarapyndan teklip edilen «Magtymguly Pyragynyň 300 ýyllygy» senesi hem 2024-2025-nji ýyllarda ÝUNESKO bilen bilelikde bellenilip geçiljek şanly seneleriň sanawyna goşuldy. Bu waka dünýä edebiýatynda we halkara medeni hyzmatdaşlygy ösdürmek, türkmen nusgawy şahyry Magtymguly Pyragynyň döredijiliginiň eýeleýän möhüm ähmiýetiniň halkara derejesinde ykrar edilýändiginiň ýene-de bir aýdyň subutnamasydyr.
Şunuň bilen baglylykda, ýakynda Tagtabazar etrabynyň Çagalar we ýetginjekler döredijilik öýünde Türkmenistanyň Magtymguly adyndaky Ýaşlar guramasynyň Mary welaýat Geňeşiniň Tagtabazar etrap Geňeşi bilen bilelikde gurnamagynda «Daşky gurşawy goramak» ady bilen surat çekmek boýunça döredijilik bäsleşigi geçirildi. Surat çekmek boýunça geçirilen döredijilik bäsleşigine orta mekdepleriň okuwçy ýaşlary gatnaşdylar. Bäsleşikde emin agzalarynyň gelen netijeleri boýunça 1-nji orna etrabyň 22-nji orta mekdebiniň 10-njy synp okuwçysy Aýnur Durdymyradowa, 2-nji orna 22-nji orta mekdebiň 9-njy synp okuwçysy Aýnowça Italmazowa, 3-nji orna 22-nji orta mekdebiň 9-njy synp okuwçysy Güljemal Rahmanýazowa dagylar mynasyp boldular. Ýeňijilere TMÝG-niň Mary welaýatynyň Tagtabazar etrap Geňeşiniň Hormat hatlary gowşuryldy, şeýle hem milli mirasymyza, pederlerimiziň ruhy we medeni gymmatlyklaryna bimöçber sarpa goýýan türkmen halkynyň Milli Lideri Gahryman Arkadagymyza, Arkadagly Gahryman Serdarymyza köp sagbolsunlar aýdyldy.
Ogulboldy ÖWEZBERDIÝEWA,
TMÝG-niň Mary welaýatynyň Tagtabazar etrap Geňeşiniň
Guramaçylyk bölüminiň baş hünärmeni.
