2024-nji «Pähim-paýhas ummany-Magtymguly Pyragy» ýylynyň 15-nji maýynda Paýtagtymyzdaky Türkmenistanyň Jemgyýetçilik guramasynyň Merkezi edarasynda Hormatly Prezidentimiziň Karary bilen tassyklanylan Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyny dabaraly bellemek boýunça geçirilmeli çäreleriň Meýilnamasyna laýyklykda, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň beýik akyldaryň döredijiligine goýýan belent sarpasyny, şahyryň edebi mirasyny ebedileşdirmek babatda alyp barýan nusgalyk işlerini halkara derejesinde giňden dabaralandyrmak, diňe bir milli derejede bolman, eýsem dünýä ýurtlarynyň ýaşlarynyň hem dana şahyryň edebi mirasa öwrülen baý döredijiligi bilen ýakyndan tanyşmaklaryny, çuňňur öwrenmeklerini gazanmak maksady bilen, Türkmenistanyň Daşary işler, Bilim we Medeniýet ministrlikleriniň, Türkmenistanyň Telewideniýe, radiogepleşikler we kinematografiýa baradaky döwlet komitetiniň hem-de Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikde guramagynda ýurdumyzyň hem-de daşary ýurtlaryň ýokary okuw mekdeplerinde bilim alýan talyplaryň arasynda «Magtymguly diýip adym tutsalar...» atly halkara onlaýn wiktorina bäsleşigi geçirildi.
Oňa ýurdumyzyň, şol sanda Merkezi Aziýa ýurtlarynyň, Russiýa Federasiýasynyň, Hytaý Halk Respublikasynyň ýokary okuw mekdeplerinden 500-e golaý talyp ýaşlar işjeň gatnaşdylar.
Bäsleşige gatnaşyjylar akyldar şahyryň döredijiliginiň özboluşly şahyrana we baý edebi mirasynyň gadyr-gymmaty hem-de daşary ýurtly tanymal ýazyjy-şahyrlaryň Magtymguly Pyragy barada aýdanlary, şeýle hem beýik akyldaryň öňe süren umumadamzat ähmiýetli ynsanperwer ýörelgeleri barada ýazan goşgulary, terbiýeçilik ähmiýetli öwüt-nesihatlary bilen baglanyşykly 3 dilde taýýarlanan test sowallaryna jogap bermek arkaly öz ukyp-başarnyklaryny görkezdiler.
Bäsleşigiň ahyrynda oňa gatnaşanlar ýurdumyzda adam hakdaky aladany ähli zatdan ileri tutýan, dünýäde ösüş arkaly parahatsöýüjülikli umumadamzat ýörelgeleri amal edýän, ýurdumyzyň halkara gatnaşyklardaky ornuny pugtalandyrmak, dünýäniň ösen döwletleri bilen dost-doganlyk gatnaşyklaryny dabaralandyrmakda türkmen ýaşlaryna giň ýol açýan, türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza hoşallyk sözlerini beýan etdiler.
Selbi ATAJANOWA,
TMÝG-niň Merkezi Geňeşiniň Halkara
hyzmatdaşlygy bölüminiň baş hünärmeni.
