Golaýda Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşi Görogly etrap medeniýet merrkezinde “Gyz-gelinleriň edebi maşgala mukaddesliginiň esasydyr” atly şygar bilen wagyz-nesihat duşuşygyny geçirdi. Maşgala medeniýetini ýokarlandyrmak we agzybirligi berkitmek, maşgala gymmatlygyny wagyz-nesihat etmek maksady bilen geçirilen duşuşyga etrap häkimliginiň, ýerli jemgyýetçilik guramalarynyň wekilleri, edara-kärhanalarda zähmet çekýän zenanlar gatnaşdylar. Duşuşykda Türkmenistanyň Magtymguly adyndaky Ýaşlar guramasynyň etrap Geňeşiniň, etrap hassahanasynyň, ýaşuly nesliň wekilleri çykyş edip, asyrlar aşyp gelýän milli ýol-ýörelgeler, ruhy-ahlak gymmatlyklar, asylly däp-dessurlar, maşgala mukaddesligi, gelin-gyzlaryň edep-ekramy, ahlak arassalygy, sagdyn durmuş kadalary, zähmetsöýerlik dogrusynda gürrüň berdiler. Sagdyn durmuş ýörelgelerine eýermek, zyýanly endiklerden daşda durmak, sagdyn iýmitlenmek bilen baglanyşykly aýdylan gymmatly öwüt-ündewler oňa gatnaşanlarda uly täsir galdyrdy.
Wagyz-nesihat duşuşygyna gatnaşyjylar Berkarar döwletiň täze eýýamynyň Galkynyşy döwründe Watanymyzy ösüşleriň ak ýolundan rowaçlyklara alyp barýan Gahryman Arkadagymyzyň we Arkadagly Gahryman Serdarymyzyň adyna alkyş sözlerini aýtdylar.
Altyn ATAKOWA,
TMÝG-niň Daşoguz welaýatynyň
Görogly etrap Geňeşiniň bölüm müdiri.
