Paýtagtymyzdaky Jemgyýetçilik guramalarynyň merkezinde Türkmenistanyň Magtymguly adyndaky Ýaşlar guramasynyň Merkezi Geňeşiniň gurnamagynda 2024-nji ýylyň 9-17-nji iýuly aralygynda Özbegistan Respublikasynyň Daşkent şäherinde sportuň futbol görnüşi boýunça çagalaryň we ýetginjekleriň arasynda geçirilen «AFL KIDS CUP-2024» atly halkara futbol bäsleşiginde baýrakly orunlara mynasyp bolan ýurdumyzyň ýaş türgenlerini sylaglamak dabarasy geçirildi.
Onda çykyş edenler soňky ýyllarda geçirilmegi däbe öwrülen «AFL Kids Cup» ýaryşy çagalaryň arasynda futboly wagyz etmekde we geljekki ýyldyzlary ýüze çykarmakda uly ähmiýete eýedigini we bu gezekki ýaryşy guraýjylardyr dürli ýurtlardan gelen futbol jemgyýetçiliginiň wekilleri türkmenistanly toparlaryň başarnygyna ýokary baha berendiklerini uly buýsanç belläp geçdiler hem-de ýurdumyzda türkmen sportunyň şan şöhratyny dünýä ýaýan we sagdyn durmuş ýörelgesini durmuşa ornaşdyrýan, ýaş nesilleriň bagtyýar durmuşyny üpjün etmek we olaryň ylymly-bilimli, sagdyn, ýokary ahlakly, giň dünýägaraýyşly, watansöýüji ynsanlar bolup ýetişmegi babatda giň mümkinçilikleri döredýän Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň janlarynyň sag, röwşen ömürleriniň uzak, mertebeli başlarynyň belent, aýdyň maksatly tutumly işleriniň uly üstünliklere beslenmegini arzuw etdiler.
Didar GELDIÝEW,
TMÝG-niň Merkezi Geňeşiniň
Guramaçylyk bölüminiň esasy hünärmeni
