Ýurdumyzda täze okuw ýylyna gabatlanyp, mekdep bazarlarynyň we göçme söwda nokatlarynyň işini ýola goýmak asylly däbe öwrüldi. 2024-2025-nji okuw ýylyna taýýarlykly barmagyň çäginde Ahal welaýatymyzda hem mekdep harytlarynyň satuw-söwdasyna giň gerim berildi.
Welaýatyň Alyjylar jemgyýetleriniň birleşigi tarapyndan etraplardaky bazarlaryň we dükanlaryň ýanynda gurnalan göçme söwda nokatlarynda okuw esbaplary, şol sanda depderler, gündelikler, surat çekmäge niýetlenen albomlar, dürli kitapçalar, beýleki okuw gollanmalary, şeýle-de okuwçy we sport egin-eşikleri, aýakgaplar elýeterli bahalardan ýaşlara hödürleýär. Şol mekdep harytlarynyň aglabasynyň ýerli önümlerdigi diýseň begendirýär.
1-nji awgustda işe başlan mekdep bazarlarydyr göçme söwda nokatlary 5-nji sentýabra çenli okuwçy ýaşlaryň hyzmatynda bolar.
Nurgeldi ÖWEZMYRADOW,
TMÝG-niň Ahal welaýat Geňeşiniň işgäri.
