Bu gün ylham joşgun alyp, sözlerim zybana geldi,
Pyragyň arzuw eýläni – ajap bir zamana geldi,
Bagtymyzyň döwlet guşy, bu Türkmenistana geldi,
At-abraýy äleme dolup, şöhrat hem şana geldi,
Dünýäniň çar künjeginden dostlarmyz salama geldi,
Adalat ak ýola düşüp, işlermiz sogaba geldi,
Ýeňişler ýeňşi döredýär, sowulmaz dowama geldi.
Halk — bagtyýar, ýurt — berkarar, maksatlar ýetdi myrada,
Türkmenistanyň ösüşi esas bolýar depgin – bada,
Dost-doganlygyň mekany boldy ýurdum ýakyn-ýada,
Ynsanperwer ýörelgeler ata-babalardan kada,
Pyragyň ata Watany baky mekan şan-şöhrada,
Döwletimiz daýanýandyr berkden tutulan binýada,
Ýüpek ýollarmyz dünýäň çar künjüne rowana geldi.
Magtymgulymyzyň ady düşdi bu gün ilden-ile,
Şygyrlary okalýandyr ýüzläp ýola, müňläp ýola,
Çagyrýandyr hak işlere, adalata, ýagşy päle,
Iň naýbaşy mekdepdir ol aňy hem-de kalby päge,
Jahanda hiç taýy ýokdur, öwrülendir ýeke-täge,
Öwrülendir ebedilik parlap durjak ruhy Tuga,
Onuň anyk jogaplary ähli kyn sowala geldi.
Gahryman Arkadagymyz, Arkadagly Serdarymyz,
Size alkyşlar tükenmez, artyp gitsin şöhradyňyz,
Siziň bilen beýge galdy bu gün abraýmyz-adymyz,
Magtymgulyň şygyrlaryn bütin dünýäge ýaýdyňyz,
Ony milli buýsançlaryň iň naýbaşysy saýdyňyz,
Beýiklere sarpa goýup, ykballara nur çaýdyňyz,
Pederleň şöhratly ýoly bakylyk – dowama geldi.
Zyýada ÝUSUBOWA,
Magtymguly adyndaky Türkmen döwlet uniwersitetiniň talyby.
