Türkmenistanyň Magtymguly adyndaky Ýaşlar guramasynyň Balkan welaýatynyň Balkanabat şäher Geňeşi hem-de Türkmenistanyň Magtymguly adyndaky Ýaşlar guramasynyň «Türkmennebit» döwlet konserniniň şahamçasy tarapyndan. Balkan welaýat Kitaphanasynda «Türkmenistanda ýaşlar baradaky döwlet syýasatynyň 2021-2025-nji ýyllar üçin döwlet Maksatnamasyny amala aşyrmak boýunça ýerine ýetirilmeli çäreleriň meýilnamasyndan» gelip çykýan wezipeleri ýaşlara düşündirmek, şeýle hem ýaşlary watansöýüjilik, zähmetsöýerlik, ahlaklylyk ruhunda terbiýelemek maksady bilen «Nusgalyk keşpler» atly şygar bilen gezelenç çäresi geçirildi.
Çäräniň dowamynda ýaşlarymyza geljekki nesillerimiziň abadan geljegini üpjün etmek barada, şeýle hem Garaşsyz we baky Bitarap Türkmenistan ýurdymyzda gadymdan gelýän parahatçylyk, ynsanperwerlik, hoşniýetlilik, myhmansöýerlik däpleri, watansöýüjilik ruhunda terbiýelenen nesilleriň kemala gelmegi ugrunda ýurdumyzda alnyp barylýan giň gerimli işler dogrusynda giňişleýin gürrüň berildi.
Gezelenjiň ahyrynda oňa gatnaşanlar milli mirasymyzy, gymmatlyklarymyzy öwrenmäge we gorap saklamaga, medeniýetimizi hem-de sungatymyzy ýaşlaryň arasynda wagyz etmäge giň mümkinçilikleri döredip berýän türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň adyna alkyş sözlerini aýtdylar.
Annajemal NURJANOWA,
Türkmenistanyň Magtymguly adyndaky Ýaşlar guramasynyň
«Türkmennebit» döwlet konserniniň şahamçasynyň
Guramaçylyk bölüminiň sanly ulgam boýunça
esasy hünärmeni.
