Türkmenistanyň Magtymguly adyndaky Ýaşlar guramasynyň Balkan welaýatynyň Gyzylarbat etrap Geňeşiniň, etrap bilim bölüminiň we beýleki jemgyýetçilik guramalarynyň bilelikde guramagynda etrap häkimliginiň mejlisler zalynda etrabyň bilim işgärlerini sylaglamak we olary täze okuw ýylynda uly hyjuw bilen ýaş nesillerimize bilim bermekde täzeçe usullary ulanmaga höweslendirmek maksady bilen «Bilim — kämilligiň binýady» ady bilen maslahat duşuşygy geçirildi.
Bu duşuşykda, etrabyň öňde baryjy mekdepleriniň okuw derslerinde öňe saýlanan okuwçylaryň dürli dillerde eden çykyşlary hem-de täze ýaş hünärmenleriň we halypa mugallymlaryň çykyşlary maslahat duşuşygyna gatnaşyjylarda uly täsir galdyrdy. Dabaranyň ahyrynda bilim bölüminde zähmet çekýän ýaşlary sylagladylar. Şeýle hem Türkmenistanyň Magtymguly adyndaky Ýaşlar guramasynyň Balkan welaýatynyň Gyzylarbat etrap Geňeşiniň we beýleki jemgyýetçilik guramalarynyň atlaryndan ýadygärlik sowgatlary gowşuryldy.
Çäräniň ahyrynda oňa gatnaşanlar okamaga, öwrenmäge, halal zähmet çekmäge giň mümkinçilikleri döredip berýän türkmen halkynyň Milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň janlarynyň sag, belent başlarynyň aman bolmagyny, il-ýurt bähbitli tutumly işleriniň hemişe rowaçlyklara beslenmegini arzuw etdiler.
Aýbibi TÄÇMYRADOWA,
Türkmenistanyň Magtymguly adyndaky Ýaşlar guramasynyň
Balkan welaýatynyň Gyzylarbat etrap Geňeşiniň uly buhgalteri.
