.jpg)
23-nji awgustda Aşgabat şäherinde geçirilen «Kids Ekspo: ähli zat çagalar üçin» atly halkara sergi-ýarmarkasynyň çäklerinde «Sumo roboty» boýunça ýaryş guraldy. Türkmenistanyň Söwda-senagat edarasy bilen «Döwrebap maslahat» hususy kärhanasynyň bilelikde guramagynda geçirilen bu täsirli ýaryşa ýurdumyzyň ähli künjeklerinden gelen 50-e golaý ýaş höwesjeňler gatnaşdylar.
Ýaryş şahsy görnüşde geçirildi. Her bir gatnaşyjy özüniň robotyny ýörite meýdançada görkezdi. Ýaponlaryň däp bolan sumo göreşi ýaly, bu ýaryşda hem robotlaryň esasy maksady garşydaşyny bellenilen çäkden daşlaşdyrmak boldy. Çekeleşikli göreşlerinde ýaş konstruktorlaryň diňe tehniki başarnyklary däl, eýsem strategik pikirlenmek ukyby hem ýüze çykdy.
Ähli gatnaşyjylar ýokary derejeli taýýarlygyny we döredijilikli çemeleşmesini görkezmek bilen, öz maşynlarynyň artykmaçlygyny subut etmek üçin tutanýerli zähmet çekdiler.
Ýaryşyň dowamynda okuwçylar özleriniň şahsy güýji bilen ýasan robotlaryny hödürlediler. Her bir robotyň agramy 1,2 kilogram bolup, ölçegi 25x25 santimetrden ybaratdy. Ulanylan akkumulýatorlaryň güýji 12 woltdan geçmeýärdi, hereketlendiriji enjam hökmünde bolsa «Ardunio T-T» motory peýdalanyldy. «Ýeňşi gazanmakda esasy zat robotyň programma üpjünçiligine ornaşdyrylan strategiýasy» – diýip, ýaryşyň baş emini Ysmaýyl Häkimow belledi.
Eminleriň netijesi boýunça ýeňijiler yglan edildi. Şeýlelikde, 1-nji orny A.S.Puşkin adyndaky bilelikdäki türkmen-rus orta umumybilim berýän mekdebiň okuwçysy Alihan Akgaýew eýeledi. Ol şol bir wagtyň özünde Maglumat tehnologiýalarynyň Türkmen-hindi merkeziniň diňleýjisi bolup çykyş edýär. 2-nji orna Aşgabat şäherindäki daşary ýurt dillerini çuňlaşdyryp öwredýän 13-nji orta mekdebiň okuwçysy, «Kämil bilim» okuw merkeziniň diňleýjisi Rozymyrat Ýagşymyradow mynasyp boldy. 3-nji orny Aşgabat şäherindäki 18-nji orta mekdebiň okuwçysy, şeýle hem Maglumat tehnologiýalarynyň Türkmen-hindi merkezinde bilim alýan Aýhan Garýagdyýew gazandy.
Ýeňijiler we baýrakly orunlara mynasyp bolanlar guramaçylar tarapyndan ýadygärlik sowgatlar bilen sylaglandylar. «Sumo roboty» boýunça geçirilen ýaryşlar sergisiniň jemleýji gününiň ýatda galyjy wakalaryň biri bolup, Türkmenistanyň ýaşlarynyň robot tehnikasyna we ýokary tehnologiýalara bolan gyzyklanmasynyň barha artýandygyny aýdyň görkezdi.
turkmenistan.gov.tm
