Golaýda Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň guramagynda «Awaza» milli syýahatçylyk zolagynda Türkmenistanyň, Azerbaýjan Respublikasynyň, Özbegistan Respublikasynyň ýokary derejedäki duşuşygynyň üstünlikli geçmegi hem-de bu ýerde kabul edilen çözgütleri wagyz etmek maksady bilen «Köpasyrlyk dostluk we goňşuçylyk strategik hyzmatdaşlygy pugtalanýar» atly «tegelek stoluň» başyndaky söhbetdeşlik geçirildi. Söhbetdeşlikde ýaşlaryň çykyşlary diňlenildi.
Arkadag şäheriniň Taryhy we ülkäni öwreniş muzeýiniň ylmy işgäri Hallygözel Gurbangeldiýewa öz çykyşynda üç döwletiň doganlyk halklarynyň taryhy we medeni umumylygy, üç ýurduň arasyndaky dostluk gatnaşyklary, şol sanda medeni we ruhy gymmatlyklar, däp-dessurlar dogrusynda täsirli gürrüňleri etdi.
Arkadag şäher energoönümçilik birleşiginiň önümçilik tehniki we uzakmöhletleýin ösüş bölüminiň esasy hünärmeni, Türkmenistanyň Ýaşlar baýragynyň eýesi Kuwwatgeldi Çaryýew öz çykyşynda ykdysadyýetiň möhüm bölegi bolan energetika pudagynda gazanylýan üstünlikler, şeýle hem dostlukly döwletleriň arasyndaky bu ugurdaky hyzmatdaşlyklar dogrusynda buýsanç bilen belledi.
Arkadag şäher häkimliginiň tehniki tükelleýiş edarasynyň hünärmeni, Türkmenistanyň Ýaşlar baýragynyň eýesi Selimberdi Esenberdiýewiň çuň mana eýe bolan çykyşy Arkadag şäheriniň döwrebap ösüşi bilen baglanyşdy. Ol öz çykyşynda döwletimiziň abraýyna abraý goşjak bu ýokary derejedäki duşuşygyň dowamynda kabul edilen resminamalaryň, şol sanda Azerbaýjan Respublikasynyň Fizuly şäheri bilen Arkadag şäheriniň arasynda doganlyk gatnaşyklaryny ýola goýmak hakynda Teswirnamanyň ähmiýeti dogrusynda belläp geçdi.
Şeýle hem çykyşlaryň her birinde ýurdumyzyň halkara abraýyny ýokarlandyrýan Gahryman Arkadagymyza, Arkadagly Gahryman Serdarymyza tüýs ýürekden çykýan alkyş sözleri aýdyldy.
Umyda KAKAÝEWA,
Türkmenistanyň Magtymguly adyndaky Ýaşlar guramasynyň
Arkadag şäheriniň Geňeşiniň Guramaçylyk bölüminiň müdiri.
