Güneşli gözel Diýarymyzda Gahryman Arkadagymyzyň, Arkadagly Gahryman Serdarymyzyň aladasy bilen gurşalan türkmen ýaşlary söýgüden doly bagtyýar durmuşyň hözirini görüp ýaşaýarlar. Ýaşlaryň iň naýbaşy, döwrebap şertlerde ösmekleri, okap, kämil bilim almaklary üçin ýurdumyzda uly işler amala aşyrylýar. Milli bilim ulgamy hemmetaraplaýyn ösýär, hil taýdan täze derejä çykýar.
Häzirki döwürde ýaş nesil başlangyç synplardan başlap, täze tehnologiýalar bilen tanyşdyrylýar, eýýäm 1-nji synpdan hormatly Prezidentimiziň adyndan netbuk enjamlary sowgat berlip, okuwçylara häzirki zaman tehnologiýalaryndan peýdalanmagyň başlangyç usullary öwredilip başlanýar. Täze tehnologiýalar, zamanabap kompýuter, multimedia enjamlary bilen üpjün edilen synp otaglary okatmagyň, bilim bermegiň usullaryny kämilleşdirmäge mümkinçilik berýär. Iňlis, rus dilleri bilen bir hatarda dünýä dillerini öwretmäge ýöriteleşdirilen orta mekdeplerde nemes, fransuz, italýan, arap, pars, hytaý, ýapon, koreý dilleri okadylýar. Okuwçylar ussat mugallymlaryň yhlasy bilen ýönekeýje programmalary düzmekden başlap, dürli taslamalaryň üstünde işleýärler. Halkara olimpiadalara, bäsleşiklere gatnaşyp, ýokary netije görkezýärler.
Bilim ulgamynda durmuşa geçirilýän şu hili giň möçberli özgertmeler, amala aşyrylýan işler kämil bilimli, täzeçe pikirlenmäge, döwrüň barha ösýän, özgerýän şertlerine çalt uýgunlaşmaga ukyply, bäsdeşlige taýýar täze nesli kemala getirmäge şert döredýär.
Mämmetoraz ORAZBERDIÝEW,
Türkmenistanyň Magtymguly adyndaky
Ýaşlar guramasynyň Balkanabat şäher Geňeşiniň
Guramaçylyk bölüminiň baş hünärmeni.
