Ýakynda Sahy Jepbarow adyndaky Arkadag şäher ýörite sungat mekdebinde Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň guramagynda baýramçylyk çäresi geçirildi. Türkmenistanyň Magtymguly adyndaky Ýaşlar guramasynyň döredilen güni mynasybetli guralan bu çäre «Öňdebaryjy ýaşlar – döwrümiziň buýsanjy» diýlip atlandyryldy. Oňa Arkadag şäherinde zähmet çekýän, okap bilim alýan ýaşlar gatnaşdylar.
Çäräniň dowamynda Gahryman Arkadagymyzyň taýsyz tagallalary netijesinde, Arkadagly Gahryman Serdarymyzyň parasatly ýolbaşçylygynda ýurdumyzda durmuşa geçirilýän ýaşlar syýasaty hem-de ýaşlaryň bagtyýar şu güni, nurana geljegi ugrunda amala aşyrylýan özgertmeler dogrusyndaky buýsançly söhbetler edildi.
Şäheriň ýaş medeniýet, sungat ussatlarynyň ýerine ýetiren aýdym-sazly çykyşlary baýramçylygyň şowhunyny has-da artdyrdy. Dabaranyň ahyrynda oňa gatnaşyjy ýaşlara baýramçylyk mynasybetli ýadygärlik toý sowgatlary gowşuryldy.
Beýzaly ATAÝEW,
Türkmenistanyň Magtymguly adyndaky Ýaşlar guramasynyň
Arkadag şäheriniň Geňeşiniň başlygynyň orunbasary.
