Türkmenistan — Beýik Ýüpek ýolunyň ýüregi ýylynyň 25-nji martynda ýurdumyzyň taryhynda möhüm jemgyýetçilik-syýasy çäräniň — Türkmenistanyň Mejlisiniň deputatlarynyň, welaýat, etrap, şäher halk maslahatlarynyň we Geňeşleriň agzalarynyň saýlawlarynyň milli kanunçylygymyza laýyklykda, ýokary guramaçylykly we üstünlikli geçirilmegi ýurdumyzda demokratiýanyň aýdyň ýol alýandygyny görkezdi.
Saýlawlar Türkmenistanyň Mejlisiniň dördünji çagyrylyşynyň ýedinji maslahatynda kabul edilen, hormatly Prezidentimiz tarapyndan gol çekilen Halk maslahatlarynyň we Geňeşleriň agzalarynyň saýlawlary hakynda Türkmenistanyň Kanunynda göz öňüne tutulan düzgünlere laýyklykda geçirildi. Bu günki gün Berkarar döwletimiziň bagtyýarlyk döwründe ýurdumyzda demokratik ýörelgeler Gahryman Arkadagymyzyň yzygiderli amala aşyrýan giň möçberli özgertmeleriniň özenini düzdi.
Deputatlyga saýlananlar Türkmenistanyň Konstitusiýasynda öz beýanyny tapan demokratik ýörelgeleriň durmuşa geçirilmegi ugrunda mynasyp işleri jemgyýetimize ornaşdyrmakda yhlasly zähmet çekip, öz tagallalaryny gaýgyrmajakdyklaryny çykyşlarynda beýan etdiler.
Halkymyz şeýle saýlawlary demokratik ýol-ýörelgeler arkaly geçirmek babatda belli bir tejribe toplady. Hormatly Prezidentimiz Türkmenistanyň Mejlisiniň deputatlary bilen duşuşygynda eden çykyşynda demokratik ýol-ýörelgeler barada aýratyn belläp geçdi.
Hormatly Prezidentimiziň amala aşyrýan taryhy özgertmeleri, demokratik ýol-ýörelgeleri biz — ýaşlary uly işlere borçly edýär. Gahryman Arkadagymyzyň aýdyşy ýaly, kanunlar hemmeler üçin deňdir. Saýlawlaryň barşynda halkyň mynasyp wekilleri kesgitlenip, olar öz ygtyýarlyklarynyň dowamynda ýerli öz-özüni dolandyryş edaralarynda zähmet çekmek arkaly saýlawçylaryň ynamyny ödärler.
Halk maslahatynyň agzalary ýerli öz-özüni dolandyryş edaralary bolan Geňeşler döwlet syýasatynyň işjeň wagyzçylarydyr. Olar ýurdumyzda durmuşa geçirilýän giň möçberli özgertmelere we ösüşiň toplumlaýyn maksatnamalaryna işjeň gatnaşýarlar.
Hormatly Prezidentimiziň tagallasy netijesinde Berkarar döwletimiziň bagtyýarlyk döwründe tutumly işler, beýik özgertmeler amala aşyrylyp, zähmetsöýer halkymyzyň, şol sanda ýaş nesilleriň eşretli durmuşynyň hözirini görüp, bagtyýar ýaşamagy, ylymly, ýokary hünärli bolup ýetişmekleri üçin ähli zerur şertler döredilýär. Gahryman Arkadagymyzyň bimöçber aladasyna eýlenen bu asylly ýörelgeleriň hözirini türkmen ýaşlary durmuşyň her bir ädiminde duýup ýaşaýarlar.
Bu günki günde Watanymyzyň syýasy, ykdysady, medeni-durmuş binýadyny pugtalandyrmakda gazanylýan beýik ýeňişlerimizde türkmen ýaşlarynyň uly goşandy bar. Watanymyzyň buýsanjy, guwanjy, röwşen ertirimiziň eýeleri bolan ýaşlar häzirki wagtda döwlet häkimiýet we dolandyryş edaralarynda ykdysadyýetimiziň ähli pudaklarynda üstünlikli zähmet çekýärler.
Milli Liderimiziň içeri we daşary syýasatynyň esasy ýörelgesi adam hakyndaky alada, parahatçylyk, dostluk, özara bähbitli hyzmatdaşlykdyr. Mähriban Arkadagymyz döwletimizi we jemgyýetimizi hemmetaraplaýyn sazlaşykly ösdürmek ugrundaky alyp barýan döwlet syýasatynyň esasyny düzýän «Döwlet adam üçindir!» diýen ýörelgä eýermek bilen, mähriban halkymyzyň bagtyýar durmuşda ýaşamagynyň hatyrasyna beýik işleri amala aşyrýar.
Täze kanunçylyk resminamalaryny işläp taýýarlamak boýunça işi ilerletmegiň möhümdigini Gahryman Arkadagymyz hemişe üns merkezinde saklaýar. Şeýlelikde, ýurdumyzyň parlamentiniň geçirýän işi, kabul edilen kanunçylyk resminamalary, halkara ülňülerini hem-de Berkarar döwletimiziň bagtyýarlyk döwrüniň anyk ýagdaýlaryny hasaba almak bilen milli kanunçylyk has hem kämilleşdirilýär.
Watanymyzda hormatly Prezidentimiziň asylly başlangyçlary bilen yglan edilen il-ýurt bähbitli, döwlet ähmiýetli maksatnamalar kanunçylygyň kämilleşdirilmegi esasynda durmuşa geçirilýär. Gysga wagtyň dowamynda döwletiň hem-de jemgyýetiň hukuk esaslaryny kämilleşdirmek boýunça alnyp barylýan işler netijeli guralyp, milli kanunlaryň onlarçasy kabul edildi. Şonuň bilen bir hatarda ýurdumyzyň milli ykdysadyýetiniň möhüm bölegi bolan hususy eýeçiligiň giň gerim bilen ösdürilmeginiň esaslaryny öz içine alan kanunlardyr maksatnamalaryň hem birnäçesi kabul edildi. «Türkmenistanyň Prezidentiniň ýurdumyzy durmuş-ykdysady taýdan ösdürmegiň 2018 — 2024-nji ýyllar üçin milli Maksatnamasyna» laýyklykda, dürli ugurlarda kiçi we orta senagat kärhanalaryny döretmek boýunça ata Watanymyzda giň möçberli işler alnyp barylýar.
Hormatly Prezidentimiziň halkymyzyň abadan ýaşaýşy ugrunda alyp barýan nusgalyk işleri biziň üçin görelde mekdebidir. Eziz Watanymyzyň durmuş-ykdysady ösüşini we mümkinçiligini mundan beýläk-de pugtalandyrmak babatda biziň her birimiziň öňümizde uly we jogapkärli wezipeler durýar.
Gahryman Arkadagymyzyň il bähbitli, adamzat ähmiýetli alyp barýan beýik tutumly işleri hemişe rowaçlyklara beslensin.
Gurbanmyrat MUHAMMEDOW,
Türkmenistanyň Magtymguly adyndaky Ýaşlar guramasynyň
Merkezi Geňeşiniň bölüm müdiri.
“Nesil” gazeti,
31.03.2018ý.
