Hormatly Prezidentimiziň pagta ýygymyna başlamaga beren ak patasyndan ruhlanan Ahal welaýatynyň «ak altyn» ussatlary möwsüme baýramçylyk ruhunda, dabaraly ýagdaýda girişdiler. Şu mynasybetli welaýatyň Ak bugdaý etrabynyň «Üzümli toprak» daýhan hojalygynyň ekerançylyk meýdanynyň golaýyndaky toý meýdançasynda bolan dabarada aýdym-sazly çykyşlara, baý öwüşginli sergilerdir gyzykly tomaşalara giň orun berildi.
Esasy sahnada welaýatyň medeniýet we sungat işgärleriniň ýerine ýetiren aýdym-sazly çykyşlarynda ata Watanymyz, eşretli döwrümiz, daýhanyň päk zähmeti joşgunly wasp edildi. Toý meýdançasyny şatlyk-şowhun gurşap alan çagynda dili senaly, il sylagly ýaşulularyň «Bismillasy» bilen berekedini bolluk bilen eçilen gowaça meýdanynda pagta ýygymyna dabaraly ýagdaýda badalga berildi. Soňra dabara Tejen etrabyndaky «Altyn asyr» pagta arassalaýjy kärhanasynda «ak kerwen» dabarasy bilen dowam etdi.
Ýeri gelende, şu şanly ýylda welaýatymyzyň babadaýhanlarynyň gowaça ýetişdiren 135 müň gektardan 280 müň tonna pagtany ýygnap, döwletimiziň «ak altyn» harmanyna goşmagy maksat edinýändigini bellemek gerek.
Nurgeldi ÖWEZMYRADOW,
TMÝG-niň Ahal welaýat Geňeşiniň işgäri.
