Ahal welaýatynyň Ak bugdaý etrabyndaky ýöriteleşdirilen 46-njy orta mekdepde ýurdumyzyň umumybilim berýän orta mekdeplerinde hereket edýän gyzlar gurnaklarynyň arasynda yglan edilen «Hünärli nesil — röwşen geljek» atly bäsleşigiň welaýat tapgyry geçirilip, oňa gatnaşan okuwçy gyzlar özara ukyp-başarnyklaryny görkezdiler.
Mukaddes Garaşsyzlygymyzyň 33 ýyllyk şanly baýramyna bagyşlanan bäsleşik şertleriň üçüsinden ybarat bolup, şoňa laýyklykda bäsdeş gyzlar öz okaýan mekdeplerinde hereket edýän gyzlar gurnagynyň işini, şeýle-de ýerine ýetirýän hünärleriniň aýratynlygyny şahyrana wasp etdiler, öz ýanlary bilen alyp getiren milli lybaslaryndaky gutarylmadyk işini eminleriň gözegçiliginde ýerine ýetirdiler, «Bereketli türkmen saçagy» atly kitaby boýunça milli däp-dessurlara laýyklykda unaş kesmek bilen, saçak bezäp, tagam taýýarlanylyşyny çeper sözleriň üsti bilen beýan etdiler.
Gyzykly geçen bäsleşikde Gökdepe etrabyndaky 32-nji orta mekdebiň «Şatumar» gyzlar gurnagy ýeňiji bolup, döwlet derejesindäki jemleýji tapgyra gatnaşmaga hukuk gazandy. Ýeňiji gyzlara bäsleşigi guraýjylar tarapyndan ýadygärlik sowgatlar gowşuryldy.
Güljemal ATDAÝEWA,
TMÝG-niň Ahal welaýat Geňeşiniň işgäri.
