Berkarar döwletiň täze eýýamynyň Galkynyşy döwründe ýurdumyzda muzeý ýygyndylarynda saklanylýan sungat eserlerini dünýä ýaýmaga, ýaşlaryň döredijilik başarnyklaryny ösdürmäge giň gerimli işler durmuşa geçirilýär. Garaşsyzlyk ýyllarynda milli ruhy we maddy gymmatlyklarymyzy dikeltmäge, merdana halkymyzyň arassa arzuw-isleglerini beýan etmäge giň mümkinçilikler döredildi.
Türkmenistanyň Şekillendiriş sungaty muzeýinde Türkmenistanyň Garaşsyzlygynyň şanly 33 ýyllyk baýramçylygy mynasybetli “Gülleýär, gül açýar, eziz Watanym” atly sergisi açyldy. Sergä muzeý işgärleri, suratkeşler, mugallymlar we talyp ýaşlar gatnaşdy. Bu sergide muzeý gymmatlyklaryndan başga-da, tanymal we ýaş suratkeşleriiň nakgaş, grafika, heýkel, gobelen eserleri görkezildi. Türkmen halkynyň bagtyýar durmuşy Altyn Şamyradowanyň “Seýilgähde gezelenç”, Şemşat Rahymowanyň “Şatlykly güneş” ýaly nakgaş eserlerinde ýagty reňkleriň sazlaşynda çekilipdir. Milli gymmatlyklarymyz we däp-dessurlarymyz, gülleýän Diýarymyzyň waspy portretlerde, natýurmortlarda we peýzažlarda şekillendirilipdir. Saparmyrat Gurbanowyň “Magtymguly” atly nakgaş eserinde akyldar şahyrymyz Magtymguly Pyragynyň keşbi Sumbar derýasynyň boýunda oturyp, tebigatyň gözelliginden ylham alýan pursadynda suratlandyrylypdyr. Suratkeş rowaçly geljege nazar aýlap goşgy setirlerini golýazma geçirýän dana şahyryň adamlaryň abadan, bolelin ýaşamagy üçin berkarar döwleti gurmagyny zerurdygyny nygtandygyny görkezýär. Aýbölek Ojarowanyň nakgaş eserinde Arkadag şäherimiziň seýilgähinde bagtyýar maşgalanyň gezelenji ýyly we özüneçekiji reňklerde ýerine ýetirilipdir. Taslamanyň ikinji meýilnamasyndaky “Akhan” binasyna Gün şöhleleriniň düşmegi Akhan bedewiniň gözelligini nygtap, taryhy döwrümiziň okgunly ösüşlerimizi alamatlandyrýar.
Ýurdumyzda medeniýetimize we sungatymyza uly sarpa goýýan türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun!
Gülabat GADAMOWA,
Türkmenistanyň Döwlet çeperçilik akademiýasynyň
amaly-haşam sungaty fakultetiniň 4-nji ýyl talyby.
