Düýn Aba Annaýew adyndaky Halkara atçylyk akademiýasynda Arkadag şäheriniň bilim ojaklarynyň talyp ýaşlarynyň arasynda Magtymguly Pyragynyň goşgularyny çeper okamak we many-mazmunyny düşündirmek boýunça «Pyragynyň paýhas hazynasy» atly bäsleşik geçirildi. Oňa Aba Annaýew adyndaky Halkara atçylyk akademiýasynyň, Berdimuhamet Annaýew adyndaky Arkadag şäher mugallymçylyk orta hünär okuw mekdebiniň, Saçly Dursunowa adyndaky Arkadag şäher lukmançylyk orta hünär okuw mekdebiniň, Sahy Jepbarow adyndaky Arkadag şäher ýörite sungat mekdebiniň bagtyýar talyp ýaşlary gatnaşdylar.
3 şert boýunça özara bäsleşen bäsdeşler, bäsleşigiň birinji şertinde edebiýat äleminiň ägirdi Magtymguly Pyragynyň bir goşgusyny sahnalaşdyryp, ýerine ýetirdiler. Ikinji şertinde oňa gatnaşyjylar eminler topary tarapyndan taýýarlanan şahyryň goşgularyndan birini labyzly okadylar we şygyryň many-mazmunyny düşündirdiler. Gyzgalaňly geçen bäsleşigiň üçünji şertinde talyp ýaşlar bijeler esasynda Magtymguly Pyragynyň iki setir ýazylan goşgysynyň dowamyny aýtdylar.
Uly joşgun bilen ýerine ýetirilen çykyşlar ýaş nesilleriň dana şahyrymyz Magtymguly Pyragynyň döredijiligini içgin öwrenýändiklerini we özlerine nusga edinýändiklerini aýdyň görkezdi.
Bäsleşigiň ahyrynda ýeňiji bolan talyp ýaşlara we işjeň gatnaşanlara Aba Annaýew adyndaky Halkara atçylyk akademiýasynyň hormat hatlary hem-de Türkmenistanyň Magtymguly adyndaky Ýaşlar guramasynyň Arkadag şäheriniň Geňeşi tarapyndan ýadygärlik sowgatlary dabaraly ýagdaýda gowşuryldy.
Umyda KAKAÝEWA,
TMÝG-niň Arkadag şäheriniň
Geňeşiniň bölüm müdiri.
