Düýn Türkmenistanyň Magtymguly adyndaky Ýaşlar guramasynyň Merkezi Geňeşiniň gurnamagynda Türkmenistanyň Jemgyýetçilik guramalarynyň merkezi binasynda «Sanly dünýä:Ýaşlar.Ösüş.Geljek.» ady bilen okuw-usuly onlaýn maslahat duşuşygy geçirildi. Maslahat duşuşygyna ýurdumyzyň edara kärhanalarynda zähmet çekýän ýaşlar, ýokary okuw mekdeplerinde bilim alýan talyplar we mugallymlar gatnaşdylar.
.png)
Maslahat duşuşygyny Türkmenistanyň Magtymguly adyndaky Ýaşlar guramasynyň Merkezi Geňeşiniň Sanly ulgam we maglumat howpsuzlygy bölüminiň müdiri Begmuhammet Meredow alyp bardy. Maslahatda ilkinji söz nobaty Türkmenistanyň Magtymguly adyndaky Ýaşlar guramasynyň Merkezi Geňeşiniň başlygy Ýazpolat Keriýewe berildi. Ol öz çykyşynda hormatly Prezidentimiziň parasatly ýolbaşçylygynda ýurdumyzda ähli ulgamlarda sanly ulgamlaryň giňden ornaşdyrylýandygy, ýaşlaryň sanly ulgamlardan kämil baş çykarmaklary üçin giň mümkinçilikleriň döredilýändigi, sanlylaşdyrylan tehnologiýalaryň döredýän amatlyklarynyň geriminiň giňeýändigi, dogrusynda giňişleýin gürrüň berdi.
Türkmenistanyň Baş prokuraturasynyň Kämillik ýaşyna ýetmedikler we ýaşlar hakyndaky kanunlaryň ýerine ýetirilişine gözegçilik bölüminiň uly prokurory Allamyrat Amandurdyýew, Türkmenistanyň Içeri işler ministrliginiň Metbugat merkeziniň bölüm müdiri, polisiýanyň podpolkownigi Toýly Abdullaýew hem täsirli çykyş edip, kiberhowpsuzlyk, sanly ulgamyň hukuk jähetleri, sosial-psihologiki täsirleri barada durup geçdiler.
Türkmenistanyň Ylymlar akademiýasynyň Halkara ylmy-tehnologiýa parkynyň Nanotehnologiýalar barlaghanasynyň müdiri Halmyrat Orunbaýew hem-de «Türkmenaragatnaşyk» agentliginiň «Türkmentelekom» EAK-nyň Sanly ykdysadyýeti ösdürmek müdirliginiň Döwlet maksatnamasyna gözegçilik bölüminiň baş hünärmeni Annamuhammet Kerimow öz çykyşlarynda sanly ulgamlaryň durmuşa ornaşdyrylmagy bilen bir hatarda, kibermedeniýet sowatlylygynyň zerurlygy barada beýan etdiler.
Çäräniň ahyrynda oňa gatnaşanlar ýurdumyzyň ähli ugurlarda gülläp ösmegi ugrunda belent maksatly işleri durmuşa geçirýän Gahryman Arkadagymyzyň hem-de Arkadagly Serdarymyzyň janlarynyň sag, ömürleriniň uzak bolmagyny, il-ýurt bähbitli beýik işleriniň elmydama rowaçlyklara beslenmegini arzuw etdiler.
Serdar GURBANMUHAMMEDOW,
TMÝG-niň Merkezi Geňeşiniň Sanly ulgam we
maglumat howpsuzlygy bölüminiň baş hünärmeni.
