2024-nji ýylyň 24-27-nji oktýabry aralygynda ÝUNESKO Klublarynyň we Assosiýalarynyň Bütindünýä Federasiýasyna Gazagystan Respublikasynyň başlylyk etmeginiň çäklerinde Gazagystan Respublikasynyň ÝUNESKO Klublary we Assosiýalary barada Milli Federasiýasynyň gurnamagynda “ÝUNESKO Bütindünýä mirasy” tema boýunça “Sungat Planetasy - 2024” (“THE PLANET OF ART-2024”) atly halkara ýaşlar festiwalynyň jemleýji tapgyry geçirildi.
Festiwala 3-18 ýaş aralygyndaky çagalar we ýaşlar bir ýa-da birnäçe ÝUNESKO-nyň Bütindünýä mirasy ýadygärliklerini suratlandyrýan sungat, heýkeltaraşlyk we bezeg sungaty hem-de fotosurat ugurlary boýunça eserleri bilen gatnaşdylar we bäsleşigiň ilkinji basgançaklaryndan onuň jemleýji tapgyryna – festiwala gatnaşmaga hukuk gazandylar.
Bu festiwala dünýäniň 34 ýurdundan ýüzlerçe ýeňiji bolan ýaşlary, şolaryň hatarynda Türkmenistanly ýeňijiler - Daşoguz şäherindäki iňlis dili, himiýa we biologiýa dersleri çuňlaşdyrylyp öwredilýän 26-njy orta mekdebiň 10-njy synp okuwçysy Selbi Rüstemowa we Arkadag şäheriniň Sahy Jepbarow adyndaky ýaşlar çeperçilik ýörite hünär mekdebiniň 1-nji ýyl talyby Gülnabat Annanurowa gatnaşyp, öz ukyp-başarnyklaryny görkezdiler.
Festiwalyň jemleýji gününde “SUNGAT PLANETASY – 2024” (“THE PLANET OF ART – 2024”), festiwalynyň ýeňijilerine Hormat hatlary we sowgatlar gowşuryldy .
2024-nji ýylyň noýabr aýynda ÝUNESKO-nyň Baş edarasynda (Pariž ş.) “Sungat Planetasy - 2024” atly Halkara ýaşlar festiwalynyň ýeňijileriniň eserleriniň sergisiniň gurnalmagy meýilleşdirilýär.
unesco.gov.tm
