2025-nji ýylyň 17-26-njy ýanwary aralygynda Monaka Knýazlygynyň Monte-Karlo şäherinde geçirilýän 47-nji halkara sirk festiwalynda dünýäniň iň meşhur sirk toparlary bilen Ýurdumyzyň «Galkynyş» milli at üstündäki oýunlar topary gatnaşyp, üstünlikli çykyşlary bilen Altyn baýraga we beýleki baýraklara mynasyp boldular.
Türkmen halkynyň milli Lideri Gahryman Arkadagymyzyň goldaw hemaýaty bilen «Galkynyş» milli at üstündäki oýunlar topary dünýäniň birnäçe abraýly döwletleriniň sirk sungatynyň festiwallaryna gatnaşyp bäş gezek ýeňiş gazanyp, baş baýraklara mynasyp bolupdy. Ýagny 2013-nji ýylda Russiýa Federasiýasynyň Moskwa şäherinde geçirilen «IDOL» bütindünýä sirk sungaty festiwalynda baş baýraga, 2014-nji ýylda Italýanyň Latina şäherinde geçirilen XVI Halkara sirk festiwalynda baş baýraga, 2015-nji ýylda Hytaý Halk respublikasynyň Guwandun welaýatynyň Çzuhaý şäherinde geçirilen II Halkara sirk sungaty festiwalynda baş baýraga, 2016-njy ýylda Gyrgyz Respublikasynyň Çolpan-Ata şäherinde geçirilen Çarwadarlaryň II bütindünýä oýunlarynda baş baýraga, 2018-nji ýylda bolsa Russiýa Federasiýasynyň Sank-Peterburg şäherinde geçirlen Fontankadaky I Halkara sirk festiwalynda «Altyn Gaetano» altyn heýkeljige mynasyp bolup üstünlikli çykyşlary bilen dünýäde uly meşhurlyga eýe boldy. Ynha 2025-nji «Halkara parahatçylyk we ynanyşmak» ýylynyň ilkinji aýynda «Galkynyş» milli at üstündäki oýunlar toparynyň halkara derejesinde üstünlik gazanmagy ýurdumyzda sirk sungatyny ösdürmek ugrunda durmuşa geçirilýän işleriň ajaýyp netijesidir.
Gahryman Arkadagymyzyň mähir yhlasyndan bina bolan Arkadag şäherinde ýerleşýän Arkadagly Gahryman Serdarymyzyň şa gadamy bilen açylyp ulanylmaga berilen Aba Annaýew adyndaky Halkara atçylyk akademiýasynyň mugallymlarynyň we bagtyýar talyplarynyň «Galkynyş» milli at üstündäki oýunlar toparynyň düzüminde üstünlikli çykyş etmekleri bizi diýseň buýsandyrýar. Akademiýada «Milli at üstündäki oýunlar», «Sirk sungaty» «Atly soprt we atly syýahatçylyk» ýaly taýýarlyk ugurlarynyň hereket etmegi we şol taýýarlyk ugurlarda bilim alýan talyplaryň halkara derejesinde geçirilýän bäsleşiklere gatnaşyp ýokary netijeleri görkezmekleri ýokary okuw mekdebimizde halkara derejeli hünärmenleriň taýýarlanýandygynyň aýdyň subutnamasydyr. Ýurdumyzyň atçylyk pudagyny ösdürmek hem-de behişdi bedewlerimiziň dünýädäki şan-şöhratyny has-da belende galdyrmak boýunça giň gerimli işler durmuşa geçirýän Türkmen halkynyň milli Lideri Gahryman Arkadagymyzyň, Arkadagly Gahryman Serdarymyzyň janlary sag bolsun, ömürleri uzak bolsun, tutýan tutumly işleri rowaç alsyn.
Söýenç AHMEDOW,
Aba Annaýew adyndaky Halkara
atçylyk akademiýasynyň mugallymy,
akademiýanyň Magtymguly adyndaky
ilkinji Ýaşlar guramasynyň başlygy.
