«Arkadag» futbol toparynyň futbolçylary Ahal welaýatynda geçýän Türkmenistanyň Futbol federasiýasynyň Kubogynyň ikinji tapgyrynyň netijeleri boýunça öňdeligi eýeledi.
Wladimir Baýramowyň topary birinji tapgyrda Balkanabadyň «Nebitçi» toparyny 4:1 hasabynda utandan soň, geçen ýylky milli Birinjiligiň kümüş medalçysy «Ahal» toparyndan 3:2 hasabynda üstün çykdy.
Türkmenistanyň iki gezek çempionynyň we wise-çempionynyň hersi bu bäsleşige 3 utuk bilen geldi. Duşuşygyň 16-njy minutynda Daýanç Meredowyň takyk urgusyndan soň «Arkadag» topary 0:1 hasabynda utulýardy. Emma hasaby deňlemek üçin, AFK Çagyryş ligasynyň çärýek finalçysyna uzak wagt gerek bolmady. Sekiz minutdan soň Güýçmyrat Annagulyýew hasaby deňledi – 1:1. 31-nji minutda geçen ýylky milli çempionatyň iň köp gol salan oýunçysy Didar Durdyýew «Arkadag» toparyny öňe çykardy – 2:1. Şu hasap bilen hem toparlar arakesmä çykdylar.
50-nji minutda Resul Hojaýew «Arkadag» toparynyň artykmaçlygyny iki topa çenli artdyrdy – 3:1. Goşmaça wagtda, ýagny 93-nji minutda Ýakupmuhammet Gowşudow «Ahal» topary bilen «Arkadag» toparynyň aralygyny iň pes derejä çenli azaltdy – 2:3. Emma Türkmenistanyň wise-çempiony ýeňişden gutulyp bilmedi.
Bu ýeňişden soň «Arkadag» topary 6 utuk bilen ýaryş sanawynda birinji boldy. Balkanabadyň «Nebitçi» topary bilen 0:0 hasabynda deňme-deň oýnan Marynyň «Merw» topary ondan 2 utuk yza galýar.
2-nji tapgyryň başga bir oýnuny garşydaşlar – «Aşgabat» topary bilen Türkmenbaşy şäheriniň «Şagadam» topary deňme-deň netije bilen tamamladylar – 1:1. Bu ýerde toplaryň ikisi-de oýnuň birinji ýarymynda tora girizildi. 23-nji minutda Şyhdurdy Amandurdyýew «Aşgabat» toparyny öňe çykardy – 1:0. Ýöne ýene 5 minutdan soň Ýagşysähet Döwletgeldiýew deňagramlygy dikeltdi.
Netijede «Aşgabat», «Şagadam» we «Nebitçi» toparlary ilkinji utuklaryny gazandylar, indi bolsa olaryň hemmesi-de üçünji orunda barýan «Ahal» toparyndan 2 utuk yzda.
TFF 2025-iň ähli oýunlarynyň Gökdepe etrabynyň Babarap geňeşliginde geçirilýändigini ýatladýarys.
TFF 2025-nji ýyl Kubogynyň üçünji tapgyrynyň oýunlary 18-nji fewralda geçiriler. Şol gün aşakdaky toparlar oýnar: «Şagadam» – «Arkadag», «Ahal» – «Nebitçi» we «Merw» – «Aşgabat».
turkmenistan.gov.tm
